قائد تحریک الطاف حسین کے میڈیابلیک آؤٹ کے خلاف شکاگو میں پاکستان قونصلیٹ کے سامنے علامتی بھوک ہڑتال

واشنگٹن۱۰ مارچ ۲۰۱۶ ؁

متحدہ قومی موومنٹ کے قائد جناب الطاف حسین کی تقاریر، تصاویر اور بیانات کی نشر واشاعت پر گزشتہ کئی ماہ سے عائد غیر آئینی پابندی اور میڈیا بلیک آؤٹ کے خلاف شکاگو میں پاکستان قونصلیٹ کے سامنے احتجاجی مظاہرہ اور علامتی بھوک ہڑتال کی گئی۔ مظاہرین نے مطالبہ کیا جناب الطاف حسین کی تقریر و تصاویر اور بیانات پر عائد پابندی فی الفور ختم کی جائے تاکہ دنیا بھر میں موجود انکے کروڑوں چاہنے والوں میں پائی بے چینی کا خاتمہ ہو سکے۔ اس موقع پر غیر آئینی پابندی کے خلاف پاکستان قونصلیٹ کے دفتر میں پٹشن جمع کرائی گئی جبکہ بین الاقوامی سفارتی نمائندوں کو ہینڈ بلز اور پٹیشن کی کاپیاں بھی دی گئیں۔احتجاجی مظاہرے اور ہڑتال میں متحدہ قومی مومنٹ امریکہ کی سینٹرل آرگنائزنگ کمیٹی کے رکن شمیم صدیقی، شکاگو چیپٹر کے ذمہ داران و کارکنان سمیت شکاگو اور قریبی ریاستوں میں مقیم پاکستانیوں کی بڑی تعداد نے شرکت کی۔ مظاہرین ایم کیو ایم کے جناب الطاف حسین کی اظہار رائے پر عائد غیر جمہوری و غیر آئینی پابندی کے خلاف پر جوش نعرے لگا تے رہے اور اپنے قائد سے والہانہ عقیدت و محبت کا اظہار کرتے رہے۔ مظاہرین نے قائد تحریک الطاف حسین کے پاکستان میں میڈیا بلیک آؤٹ کے خلاف احتجاجی بینرز بھی اٹھا رکھے تھے۔اس موقع پر سینٹرل آرگنائزنگ کمیٹی کے رکن شمیم صدیقی نے شرکاء سے اپنے خطاب میں کہا کہ جناب الطاف حسین پر عائد پابندی حق و سچ پر قدغن ہے۔ ماضی میں بھی مظلوم عوام اور انکے ہر دلعزیز قائد کو ایک دوسرے سے دور کرنے کی ناکام سازشیں رچی جاتی رہی ہیں اورموجودہ میڈیا بلیک آؤٹ بھی دراصل قائد تحریک جناب الطاف حسین سے انکے چاہنے والوں کو دور کرنے کی سازش کا حصہ ہے۔ انھوں نے کہا کہ اس پابندی سے قائد تحریک کی آزادی اظہار ہی نہیں بلکہ کروڑوں پاکستانیوں جو انہیں دیکھنا اور سننا چاہتے ہیں انہیں انکے بنیادی حق سے محروم کیا جارہا ہے۔