کارکنان و عوام اپنی صفوں میں اتحاد برقرار رکھیں اور ہر قسم کے حالات میں اپنے حوصلہ بلند رکھیں۔ الطاف حسین

لندن۔۔۔31 جنوری 2016ء

متحدہ قومی موومنٹ کے قائد جناب الطاف حسین نے کہاہے کہ ایم کیوایم حق کی راہ پرچلنے والی تحریک ہے اورحق کی جدوجہد کرنے والوں کوہمیشہ آزمائشوں اورامتحانات کا سامنا کرنا پڑتا ہے اورجوکسی بھی آزمائش میں ثابت قدم رہتے ہیں اللہ تعالیٰ انہیں ہمیشہ سرخرو کرتا ہے۔ یہ بات انہوں نے رابطہ کمیٹی لندن اور پاکستان کے ارکان اورشعبہ جات کے ارکان سے ٹیلی فون پر گفتگوکرتے ہوئے کہی۔ جناب الطاف حسین نے کہاکہ ایم کیوایم ، غریب ومتوسط طبقہ کے عوام کے حقوق کیلئے جدوجہد کررہی ہے، ایم کیوایم کی جدوجہد پریشان اور مفلوک الحال عوام کو مسائل ومشکلات اورپریشانیوں سے نجات دلانے اور انہیں باعزت زندگی گزارنے کا موقع فراہم کرنا ہے۔ جب سے ایم کیوایم وجودمیں آئی ہے اس نے ہردورمیں طرح طرح کی آزمائشوں کاسامناکیاہے اور آج بھی کررہی ہے، ہم اپنے مقصدمیں سچے ہیں اور ہماری نیت اورارادے نیک ہیں لہٰذااللہ تعالیٰ نے ہرآزمائش کے موقع پر ہمیں ہمت وحوصلہ اورطاقت عطافرمائی اورہر امتحان میں ہمیں سرخرو کیا۔ انہوں نے تحریک کے تمام کارکنان وعوام سے کہاکہ وہ اپنی صفوں میں اتحادبرقراررکھیں،کسی بھی آزمائش سے ہرگز پریشان نہ ہوں اورہرقسم کے حالات میں اپنے حوصلہ بلند رکھیں ،ثابت قدمی سے اپنی جدوجہد جاری رکھیں اور اس بات پر کامل یقین رکھیں کہ حق وصداقت کی جدوجہد کرنے والوں کو اللہ تعالیٰ کی تائید وحمایت حاصل ہوتی ہے ۔اللہ تعالیٰ ہمیں ہرامتحان میں سرخروکرے گااور انشاء اللہ فتح حق پرستوں کا مقدر ہوگی۔