ڈاکٹرظفرکمالی کا حکومت سندھ کی جانب سے عوامی ضروریات کو نظر انداز کرتے ہوئے من مانی ترقیاتی اسکیموں کی منظوری اور ترقیاتی فنڈز کرپشن کی نذر کرنے کی تیاریوں کی اطلاعات پراظہارِ تشویش

میرپورخاص:۔۔۔ 30جنوری2016

حق پرست رکن سندھ اسمبلی ڈاکٹرظفرکمالی نے حکومت سندھ کی جانب سے عوامی ضروریات کو نظر انداز کرتے ہوئے من مانی ترقیاتی اسکیموں کی منظوری اور ترقیاتی فنڈز کرپشن کی نذر کرنے کی تیاریوں کی اطلاعات پر تشویش کرتے ہوئے کہاہے کہ ضلعی انتظامیہ کی ملی بھگت سے ترقیاتی فنڈز ہڑپ کرنے کی تیاری کرلی گئی،حکومت سندھ کی من مانیوں سے کمیونٹی ڈیولپمنٹ پروگرام غیر موثر ہوجائے گا۔ اپنے ایک بیان میں انہوں نے کہاکہ حکومت سندھ کی جانب سے کمیونٹی ڈیولپمنٹ پروگرام کے تحت تمام اراکین اسمبلی سے ترجیحات طلب کی گئی تھیں جس پر عوامی ضروریات کو مد نظر رکھتے ہوئے میرپورخاص کے لئے مختص چار کروڑ کے ترقیاتی فنڈزسے سڑکیں اور فراہمی و نکاسی آب کا نظام درست کرنے کی ترجیحات پیش کی گئیں لیکن اطلاعات کے مطابق حکومت سندھ نے ضلعی انتظامیہ کی ملی بھگت سے ان تمام ترقیاتی اسکیموں کو نظر انداز کرکے ڈرینج سسٹم کی درستگی کے نام پر فنڈز ہڑپ کرنے کی تیاری کرلی ہے۔ انہوں نے مزید کہا کہ حکومت سندھ کی بدترین کرپشن اور عوام دشمنی پر مبنی اقدامات سے میرپورخاص پہلے ہی کھنڈرات میں تبدیل ہوچکا ہے اور عوام بنیادی سہولیات سے محروم ہیں۔