میئر اور ڈپٹی میئر کے انتخاب کیلئے صوبہ سندھ اورصوبہ پنجاب کی صوبائی حکومتوں کی جانب سے کھلی رائے شماری کرانے کے فیصلہ کی اطلاعات انتخابی عمل پر اثر انداز ہونے کی مذموم کوشش ہے ، رابطہ کمیٹی ایم کیوایم
چیف آف الیکشن کمشنر سردار رضا سندھ اورپنجاب کی صوبائی حکومتوں کی جانب منتخب بلدیاتی ارکان پر دباؤ اور خوفزدہ کرنے کا فی الفور نوٹس لیں، رابطہ کمیٹی ایم کیوایم
حکومتی حلقوں کی جانب سے ڈسٹرکٹ چیئرمین اور وائس چیئرمین کے انتخاب میں پولیس کے استعمال کی خبریں پہلے ہی گرد ش کررہی ہیں، رابطہ کمیٹی ایم کیوایم
میئر اور ڈپٹی میئر کے انتخاب میں کھلے عام ووٹ دینے کی اطلاعات سے سندھ اور پنجاب کے عوام میں تشویش کی لہر دوڑ گئی ہے ، رابطہ کمیٹی
کراچی ۔۔۔18، جنوری 2016ء
متحدہ قومی موومنٹ کی رابطہ کمیٹی نے 2015ء کے بلدیاتی انتخابات کے نتیجے میں بننے والی مقامی حکومتوں کے قیام کیلئے میئر اورڈپٹی میئر کے انتخاب کیلئے صوبہ سندھ اورصوبہ پنجاب کی صوبائی حکومتوں کی جانب سے کھلی رائے شماری کرانے کے فیصلے کی اطلاعات کو انتخابی عمل پر اثر انداز ہونے کی مذموم کوشش قرار دیا ہے اور چیف آف الیکشن کمشنر سردار رضا سے مطالبہ کیا ہے کہ سندھ اورپنجاب کی صوبائی حکومتوں کی جانب منتخب بلدیاتی ارکان پر دباؤ اور انہیں خوفزدہ کرنے کا فی الفور نوٹس لیاجائے ۔ایک بیان میں رابطہ کمیٹی نے کہاکہ سندھ اور پنجاب کی صوبائی حکومتیں نومنتخب بلدیاتی نمائندوں پر دباؤ ڈال رہی ہیں کہ اگر تم نے ہمارے امیدوار کی حمایت نہیں کی تو تمہارا انجام برا ہوگا اور اس کے باعث منتخب بلدیاتی نمائندے میں صوبائی حکومتوں کے دباؤ کے باعث خوف و ہراس پایا جاتا ہے ۔رابطہ کمیٹی نے کہاکہ حکومتی حلقوں کی جانب سے ڈسٹرکٹ چیئرمین اور وائس چیئرمین کے انتخاب میں پولیس کے استعمال کی خبریں پہلے ہی گرد ش کررہی ہیں اور اب میئر اورڈپٹی میئر کے انتخاب میں کھلے عام ووٹ دینے کی اطلاعات سے سندھ اور پنجاب کے عوام میں تشویش کی لہر دوڑ گئی ہے جس کا نوٹس لینا چیف الیکشن کمشنر کی ذمہ داری ہے ۔