شہر میں کے الیکٹرک کے ناقص اور غیر معیاری ڈیجیٹل برانڈ کے میٹروں کی تنصیب پر رابطہ کمیٹی کااظہار مذمت

کراچی ۔۔۔26، دسمبر2015ء 

متحدہ قومی موومنٹ کی رابطہ کمیٹی نے شہر کے مختلف علاقوں میں کے الیکٹرک کی جانب سے غیر معیاری اور ناقص ڈیجیٹل میٹرز کی تنصیب کی سخت ترین الفاظ میں مذمت کی ہے اور کہا ہے کہ ناقص ڈیجیٹل میٹروں کی تنصیب کے باعث شہری ہر ماہ بھاری بھرکم اضافی بل بھرنے پر مجبور ہیں ۔ ایک بیان میں رابطہ کمیٹی نے کہاکہ کے الیکٹرک کی انتظامیہ نے غیر معیاری اور ناقص برانڈ کے ڈیجیٹل میٹرز لگا کر شہریوں کو دوہرے عذاب میں مبتلا کردیا ہے اور جب شہری ناقص ڈیجیٹل میٹروں کے باعث زائد بلنگ پر کے ای ایس سی کے دفاتر پر رابطہ کرتے ہیں تو عملے کی جانب سے شہریوں کو بل کم کرنے کے بجائے مکمل بل جمع کرانے پر نہ صرف زور دیا جارہا ہے بلکہ باقاعدہ اصرار تک کیاجارہا ہے ۔ رابطہ کمیٹی نے کہاکہ کراچی کے شہری ملک بھر میں سب سے زیادہ نرخ پر بجلی خرید رہے ہیں لیکن اس کے باوجود کے الیکٹر انتظامیہ کی جانب سے اپنے صارفین کو سہولیات فراہم کرنے کے بجائے انہیں مزید مشکلات سے دوچار کرنے کی جتنی بھی مذمت کی جائے وہ کم ہے ۔ رابطہ کمیٹی وزیراعظم پاکستان نواز شریف اور وزیراعلیٰ سندھ قائم علی شاہ سے مطالبہ کیا کہ شہر میں کے الیکٹرک کی جانب سے ناقص اور غیر معیاری ڈیجیٹل برانڈ کے میٹروں کی تنصیب کا سختی سے نوٹس لیاجائے اور اس میں ملوث کے الیکٹر کے افسران اور عملے کے خلاف فی الفور تادیبی کارروائی عمل میں لائی جائے ۔