بچوں کے حفاظتی ٹیکوں کے صوبائی پروگرام میں 5مختلف بیماریوں سے بچوں کو بچانے والی مختلف ویکسین کا اسٹاک ختم ہونے پر حق پرست اراکین سندھ اسمبلی کا اظہار تشویش

کراچی۔۔۔18دسمبر2015ء

متحدہ قومی موومنٹ کے اراکین سندھ اسمبلی نے صوبے میں بچوں کے حفاظتی ٹیکوں کے پروگرام ( ای پی آئی ) میں بچو ں کو 5مختلف بیماریوں سے بچانے والی پینٹا ویلنٹ ویکسین، ٹی بی سے بچاؤ کی حفاظتی ویکسین اور پولیو انجکشن ویکسین کا اسٹاک ختم ہونے پر گہری تشویش کا اظہار کیا ہے ۔ایک بیان میں حق پرست ارکان اسمبلی نے کہا کہ صوبائی حفاظتی ٹیکوں کے پروگرام کے اعلیٰ حکام کی عدم دلچسپی کے سبب صوبے کی آئندہ نسل کا مستقبل شدید خطرات سے دوچار ہے لیکن صوبائی حکومت کی جانب سے اس اہم موضوع پر کوئی توجہ نہیں دی جارہی ہے ۔انہوں نے کہاکہ صوبائی حکومت اور حفاظتی ٹیکوں کے پروگرام کی انتظامیہ کی جانب سے صوبے کے معصوم بچوں اور قوم کے مستقبل سے متعلق اس انتہائی اہمیت کے حامل معاملے پر غیر سنجیدگی قابل افسو س ہے۔انہوں نے وزیر اعظم پاکستا ن میاں محمد نواز شریف اوروزیر اعلیٰ سندھ سید قائم علی شاہ سے مطالبہ کیا کہ وہ صوبے میں بچوں کے حفاظتی ٹیکوں کے پروگرام ( ای پی آئی ) میں بچو ں کو 5مختلف بیماریوں سے بچانے والی ویکسین، ٹی بی سے بچاؤ کی حفاظتی ویکسین اور پولیو انجکشن ویکسین کااسٹاک ختم ہونے کا سنجیدگی سے نوٹس لیکر اس معاملے کو حل کرنے کیلئے فوری اقدامات کریں اور صوبے میں بچوں کے حفاظتی ٹیکوں کے پروگرام ( ای پی آئی ) کے محکمے کو فوری ویکسین فراہم کروائیں ۔