پیرس میں دہشت گردی کے ہولناک واقعات قابل مذمت ہیں، الطاف حسین

لندن۔۔۔14، نومبر2015ء

متحدہ قومی موومنٹ کے قائد جناب الطاف حسین نے فرانس کے دارالحکومت پیر س میں دہشت گردی کے ہولناک واقعات کی سخت ترین الفاظ میں مذمت کی ہے اور ان واقعات میں سوسے زائد بے گناہ شہریوں کی ہلاکتوں اورمتعددافرادکے زخمی ہونے پرگہرے دکھ اور افسوس کا اظہار کیا ہے ۔ ایک بیان میں جناب الطاف حسین نے کہاکہ چارلی ہیبڈو کے دفترپردہشت گردوں کے مسلح حملے اور متعدد افراد کے سفاکانہ قتل کے بعد پیرس میں گزشتہ روزہونے والے خودکش دھماکوں اوروحشیانہ فائرنگ کے ان واقعات کی جتنی بھی مذمت کی جائے وہ کم ہے۔ یہ المناک واقعات دردمند دل رکھنے والے ہرانسان کیلئے گہرے صدمے کا باعث ہیں اور انسانیت پر یقین رکھنے والا کوئی بھی فرد ان واقعات کی مذمت کیے بنا نہیں رہ سکتا۔ جناب الطاف حسین نے کہاکہ دکھ کی اس گھڑی میں مجھ سمیت میری جماعت متحدہ قومی موومنٹ کے کارکنان اور پاکستانی عوام فرانس کے صدر، حکومت اورفرانسیسی عوام بالخصوص جاں بحق افراد کے سوگوارلواحقین کے غم میں برابر کے شریک ہیں اوران سے دلی تعزیت کااظہارکرتے ہیں ۔ انہوں نے دعاکی کہ اللہ تعالیٰ ہلاک شدگان کے سوگوار لواحقین کو یہ عظیم صدمہ برداشت کرنے کا حوصلہ دے اور زخمیوں کو جلد ومکمل صحت یاب کرے۔