ملک میں آنے والے زلزلہ متاثرین کی امداد کیلئے لگائے گئے خدمت خلق فاؤنڈیشن کے سینکڑوں امدادی کیمپ جاری ہیں

کراچی ۔۔۔6، نومبر2015ء 

متحدہ قومی موومنٹ کے فلاحی ادارے خدمت خلق فاؤنڈیشن کی جانب سے ملک میں آنے والے زلزلہ متاثرین کی امداد کیلئے لگائے گئے سینکڑوں امدادی کیمپ جاری ہیں ۔ امدادی کیمپوں کے گیارہویں روز بھی مخیر حضرات اور عوام نے رابطہ کیا اور زلزلہ متاثرین کیلئے دل کھول کر امدادی سامان اور عطیات جمع کرائے۔ ا مدادی کیمپوں پر قومی نغمے اور ترانوں کی ریکارڈنگ بجائی جارہی ہیں اور عوام سے بڑھ چڑھ کر زلزلہ متاثرین کیلئے امدادی سامان جمع کرانے کی اپیلیں کی جارہی ہیں ۔ امدادی کیمپوں پر حق پرست ارکان قومی وصوبائی اسمبلی اپنی ڈیوٹیاں انجام دے رہے ہیں اور امدادی کیمپوں پر بیٹھ کر نہ صرف عوام سے عطیات وصول کررہے ہیں بلکہ ان کے جذبے کو بھی سراہا رہے ہیں ۔ خدمت خلق فاؤنڈیشن کی جانب سے زلزلہ متاثرین کیلئے کراچی میں 40امدادی کیمپوں سمیت ملک بھر میں 150امدادی کیمپ قائم کئے گئے ہیں جہاں سے زلزلہ متاثرین کیلئے بڑی تعداد میں امدادی سامان ، غذائی اجناس اور ادویات سمیت ضروریات زندگی کا دیگر سامان ٹرکوں کے ذریعے پہنچایا جارہا ہے ۔اسی طرح خدمت خلق فاؤنڈیشن کے صدر دفتر میں زلزلہ متاثرین کیلئے قائم کیا گیا مرکزی کیمپ بھی چوبیس گھنٹے جاری ہے جہاں زلزلہ متاثرین کیلئے جمع ہونے والے امدادی سامان کی پیکنگ میں سینکڑوں رضاکار مصروف ہیں۔ خدمت خلق فاؤنڈیشن کے امدادی کیمپ پر امدادی سامان جمع کرانے کیلئے آنے والے نوجوانوں ، بزرگوں اور خواتین نے اپنے جذبات کااظہار کرتے ہوئے کہاکہ خدمت خلق فاؤنڈیشن کی فلاحی سرگرمیوں کسی تعریف کی محتاج نہیں ہیں ، ملک میں آنے والے زلزلوں ، طوفان ، قحط سالی اور حادثات میں خدمت خلق فاؤنڈیشن کی سرگرمیاں نمایاں رہی ہیں اور اس کا قومی سطح پر اعتراف بھی کیا گیا ہے ۔ ان کا کہنا تھا کہ خدمت خلق فاؤنڈیشن کے ذریعے ہم زلزلہ متاثرین کی جو کچھ بھی امداد کرسکتے ہیں وہ کررہے ہیں اور ہماری دعا ہے کہ اللہ تعالیٰ قائد تحریک جناب الطاف حسین ، ایم کیوایم اور خدمت خلق فاؤنڈیشن کو زلزلہ متاثرین کی امداد و بحالی کیلئے زیادہ سے زیادہ توفیق عطا فرمائے ۔