اوگرا کی جانب سے پیٹرولیم مصنوعات کی قیمتوں میں اضافے کی سمری وزارت پیٹرولیم کو بھیجنے پر ارکان قومی اسمبلی کا اظہار تشویش
بین الاقوامی مارکیٹ میں پیٹرول کی قیمتوں میں کمی کی جارہی ہے اور پاکستان میں اضافہ عوام پر ظلم ہوگا، ارکان قومی اسمبلی
عالمی مارکیٹ میں پیٹرولیم مصنوعات کی قیمتوں میں کمی کے ثمرات سے پاکستان کے عوام کو محروم رکھنا حکومت کی کھلی ناکامی ہوگی، ارکان قومی اسمبلی
کراچی ۔۔۔31، اکتوبر2015ء
متحدہ قومی موومنٹ کے حق پرست ارکان قومی اسمبلی نے اوگرا کی جانب سے پیٹرولیم مصنوعات کی قیمتوں میں اضافے کی سمری وزارت پیٹرولیم کوبھیجنے پر گہری تشویش کااظہار کیا ہے اور کہا ہے کہ بین الاقوامی مارکیٹ میں پیٹرول کی قیمتوں میں کمی کی جارہی ہیں جبکہ پاکستان میں پیٹرولیم مصنوعات کی قیمتوں میں اضافہ سراسر عوام پر ظلم ہوگا ۔ اپنے مشترکہ بیان میں انہوں نے کہاکہ ملک بھر کے عوام پہلے ہی مہنگائی اور بیروزگاری کے باعث کسمپرسی کی زندگی گزار رہے ہیں اورعالمی مارکیٹ میں پیٹرولیم مصنوعات کی قیمتوں میں کمی کے ثمرات سے پاکستان کے عوام کو محروم رکھنااور عوام کو اس ضمن میں ریلیف دینے کے بجائے اضافہ کرنا حکومت کی کھلی ناکامی ہوگی اور عوام سے کئے گئے وعدوؤں کو وفا نہ کرنے کا عوام دشمن اقدام ہوگا ۔انہوں نے کہا کہ ہونا تو یہ چاہئے تھا کہ عالمی مارکیٹ میں پیٹرولیم مصنوعات کی قیمتوں میں کمی کے پیش نظر حکومت عوام کو ریلیف فراہم کرتی اور اپنے دعوؤں کی پاسداری یقینی بناتی ،موجودہ حکومت نے عوام کو ہر شعبے میں ریلیف کی فراہمی کے بلند و بانگ دعوے کئے تھے لیکن اس کے برعکس اوگرا کی جانب سے پیٹرولیم مصنوعات کی قیمتوں میں اضافے کی سمری وزارت پیٹرولیم کو ارسال کرناان دعوؤں کی نفی ہے اور ملک بھر کے عوام کو موجودہ حکومت کے ریلیف کے دعوؤں سے مایوس کرنے کے مترادف ہے ۔ حق پرست ارکان قومی اسمبلی نے وزیراعظم پاکستان میاں محمد نواز شریف سے مطالبہ کیا کہ اوگرا کی جانب سے پیٹرولیم مصنوعات کی قیمتوں میں اضافے کی سمری وزارت پیٹرولیم کو بھیجنے کا سختی سے نوٹس لیاجائے اور حکومت عوام کو مایوسی کی دلدل میں دھکیلنے کے ایسے اقدامات اٹھانے سے باز رہے۔