عید الضحیٰ کے سلسلے میں ایم کیوایم رابطہ کمیٹی کی زیر صدارت اے پی ایم ایس او کے کارکنان و ذمہ داران کا اجلاس

کراچی۔۔۔23ستمبر2015ء

متحدہ قومی موومنٹ کی رابطہ کمیٹی کی زیر صدارت عید الضحیٰ کے تینوں روز چرم قربانی جمع کرنے کے سلسلے میں آل پاکستان متحد ہ اسٹوڈینٹس آرگنائزیشن کے کارکنان اور ذمہ دارا ن کا اجلاس منعقد کیا گیا ۔اجلاس میں ایم کیوا یم کی رابطہ کمیٹی کے رکن سید امین الحق ، انچارج سینٹرل آگنائزنگ کمیٹی وسیم اختر ، رکن طارق جاوید ، چےئر مین اے پی ایم ایس او سرفراز احمداور ارکان مرکزی کابینہ نے شرکت کی۔اس موقع پر سید امین الحق نے کارکنان کو ہدایت کی کہ وہ اپنے اپنے علاقوں میں خدمت خلق فاؤنڈیشن کے رضاکاران کے ہمراہ قربانی کی کھالیں جمع کرتے وقت حکومت کی جانب سے جاری کردہ ضابطہ اخلاق پر سختی سے علمدرآمد کریں اور عید قرباں پر امن وامان کے سلسلے میں قانون نافذ کرنیوالے اداروں کے ذمہ داران سے مکمل تعاون کریں ،انہوں نے کارکنان کو تلقین کی کہ وہ عوام سے خوش اخلاقی ،محبت اور خلوص سے پیش آئیں، کسی بھی قسم کے جبر سے مکمل پرہیز کریں اور رضاکارانہ طور سے خدمت خلق فاؤنڈیشن کو قربانی کی کھالیں دینے والوں سے اظہار تشکرکریں ۔وسیم اختر نے کہاکہ کارکنان ماضی کی طرح اس مرتبہ بھی جناب الطاف حسین کی امن پسندپالیسی پر عمل کرتے ہوئے کسی بھی قسم کے تصادم اور تشددسے پرہیز کریں اور اپنے درمیان موجود شرپسندوں پر کڑی نظر رکھیں۔ اس موقع پر طارق جاوید نے کارکنان کو حکومت کی جانب سے جاری کردہ ضابطہ اخلاق پڑھ کر سنایا ۔