اے پی ایم ایس او کے تحت نیپا چورنگی پر لاہور ہائی کورٹ کے یکطرفہ فیصلے کے خلاف پرامن احتجاجی مظاہرہ

کراچی ۔۔۔10، ستمبر2015ء 

آل پاکستان متحدہ اسٹوڈینٹس آرگنائزیشن کے زیراہتمام نیپا چورنگی پر لاہور ہائیکورٹ کی جانب سے قائد تحریک جناب الطاف حسین کی تقاریر اور تصاویر پر پابندی کے یکطرفہ فیصلے کے خلاف پرامن احتجاجی مظاہرہ کیا گیا ۔ احتجاجی مظاہرے میں اے پی ایم ایس او کے چیئرمین سرفراز صدیقی ، مرکزی کابینہ کے اراکین اور طلباء سمیت مختلف طبقہ ہائے فکر کے افراد نے کثیر تعداد میں شرکت کی ۔ احتجاجی مظاہرے کے شرکاء نے اپنے ہاتھوں میں پلے کارڈز اور بینرز بھی اٹھا رکھے تھے جن پر لاہور ہائیکورٹ کے یکطرفہ فیصلے کے خلاف اور قائد تحریک جناب الطاف حسین کے حق میں نعرے جلی حروف میں تحریر تھے ۔ اس موقع پر شرکاء نے لاہو ر ہائی کورٹ کے یکطرفہ فیصلے کے خلاف اپنے جذبات کااظہار کیا اور زبردست نعرے بازی بھی کی ۔ احتجاجی مظاہرے کے شرکاء سے خطاب کرتے ہوئے چیئرمین اے پی ایم ایس او سرفراز صدیقی نے کہاکہ بانی و قائد تحریک جناب الطاف حسین کی تقاریر اور تصاویر پر پابندی کا فیصلہ آمرانہ ہے اور ایسا محسوس ہوتا ہے کہ ملک میں جمہوریت نام کی کوئی چیز نہیں ہے ۔ انہوں نے کہاکہ جناب الطا ف حسین کے خلاف آج جس پیمانے پر سازشیں تیار کی جارہی ہیں اور جھوٹے پروپیگنڈے کئے جارہے ہیں ان کے سامنے طلباء سیسہ پلائی دیوار ثابت ہوں گے ۔ انہوں نے مزید کہاکہ لاہور ہائی کورٹ کا یکطرفہ فیصلہ ہم کس طرح سے قبول کریں جبکہ اس حوالے سے ایم کیوایم کے موقف کو سنا ہی نہیں گیا اور نہ ہی اس میں انصاف کے تقاضوں کو پورا کیا گیا ہے ۔ سرفراز صدیقی نے مظاہرے میں شرکت کرکے احتجاج ریکارڈ کرانے پر طلباء کا شکریہ ادا کیا اور کہاکہ اے پی ایم ایس او بانی و قائد تحریک جناب الطا ف حسین کی قیادت میں اپنی جدوجہد جاری رکھے گی اورظالم قوتوں کے آگے سر نہیں جھکائے گی ۔