ایم کیو ایم رابطہ کمیٹی اور حق پرست ارکان سندھ اسمبلی کے وفد کا ایم کیو ایم فوٹو سیکشن کے شہید رکن محمد ہاشم کے گھر کادورہ

کراچی ۔۔۔۔۔10اگست 2015

متحدہ قومی مومنٹ کے قائد جناب الطاف حسین کی جانب سے ایم کیو ایم رابطہ کمیٹی اور حق پرست ارکان اسمبلی کے وفد نے ایم کیو یم کے سینئر کارکن اور فوٹو سیکشن کے رکن شہید محمد ہاشم کے گھر کا دورہ کیا ۔وفد میں رابطہ کمیٹی کے ارکا ن محترمہ زریں مجیدسید امین الحق ، محمد کمال ، اور حق پرست اراکین سندھ اسمبلی شامل تھے ۔اس موقع پر وفد کے ارکان نے شہید کے سوگوار اہل خانہ، اہل محلہ او ر احباب سے محمد ہاشم کے المناک ماورائے عدالت قتل پر گہرے دکھ اور تعزیت کا اظہار کیا ۔اس موقع پر رکن سندھ اسمبلی محمد حسین نے میڈیا نمائندگا ن سے گفتگوکرتے ہوئے کہا کہ کراچی آپریشن کے آغاز سے اب تک ایم کیو ایم کے 150کارکنان کو گرفتاری کے بعد لاپتہ کیا جاچکا ہے جن کو کسی عدالت میں پیش نہیں کیا گیا۔انہوں نے کہاکہ محمد ہاشم ایم کیو ایم کے سینئر کارکن تھے جنہیں 6مئی2015ء کو دفتر سے گھر جاتے ہوئے راستے سے گرفتار کرکے لاپتہ کر دیا گیا تھا اور گزشتہ روز انکے اہل خانہ کو مقامی پولیس اسٹیشن کی جانب سے انکی شہادت اور جامشورو میں لاوارث قرار دیکر تدفین سے مطلع کیا تھا،ہمارے بیگناہ کارکنان کی بلاجواز گرفتاریوں اور انکو لاپتہ کئے جانے کا سلسلہ مسلسل جاری ہے اور اب تک ہمارے 40سے زائدکارکنان کو ماورائے عدالت اور آئین شہید کیا جاچکا ہے ،ہم نے انصاف کیلئے ملک کے ہر فورم پر آواز بلند کی ہے اورہر طرح کا آئینی اور قانونی طریقہ آزماکر دیکھ لیا لیکن کہیں سے ہمارے کارکنان اور انکے اہل خانہ کو انصاف فراہم نہیں کیا جارہاہے۔اس موقع پر شہید محمد ہاشم کے اہل خانہ نے وفاقی و صوبائی حکومت اور چیف جسٹس سپریم کو رٹ آف پاکستان سے انصاف فراہم کرنے کا مطالبہ کیا ۔