سندھ میں غیراعلانیہ مارشل لاء نافذکردیا گیا ہے، الطاف حسین

لندن۔۔۔17، جولائی2015ء

متحدہ قومی موومنٹ کے قائد جناب الطاف حسین نے کہاہے کہ سندھ میں غیراعلانیہ مارشل لاء نافذکردیا گیا ہے ۔ ایک بیان میں جناب الطاف حسین نے کہاکہ سندھ میں غیراعلانیہ مارشل کے نفاذ کے سلسلے میں پیپلزپارٹی کی حکومت نے سندھ کے فوجی حکمرانوں سے مک مکا کرکے یہ طے کرلیا ہے کہ جن لوگوں کے کرپشن میں بڑے بڑے نام ہیں ، انہیں ملازمتوں سے علیحدہ کرنے کا اعلان کرتے ہیں جنہیں پیپلزپارٹی نے مختلف محکموں کے اعلیٰ عہدوں پر فائز کیا تھا ۔ انہوں نے کہاکہ اربوں کھربوں روپے کی کرپشن میں ملوث برطرف سرکاری افسران میں وہ افسران شامل ہیں جو پہلے ہی ملک سے فرار ہوچکے ہیں اور اب وہ یہ بتانے سے قاصر ہیں کہ انہوں نے کرپشن کی مد میں اربوں کھربوں روپے کماکر کس کے حوالے کیے ہیں۔ جناب الطاف حسین نے کہاکہ پیپلزپارٹی کا حکمراں طبقہ، ذوالفقار علی بھٹو کے زمانے سے لیکر آج کے دن تک باربار حکومتیں بنانے کیلئے مہاجروں اورایم کیوایم کو جھوٹے وعدے اور طفل تسلیاں دے کر ایم کیوایم کے سادہ لوح ارکان پارلیمنٹ کو بہکاتارہا ہے اور سندھ کی اقتدار مافیا ہمیشہ سے مہاجروں کا مکمل خاتمہ چاہتی ہے ۔ انہوں نے کہاکہ آج پیپلزپارٹی والے ایم کیوایم کے خلاف کئے جانے والے اقدامات کے خلاف خوشی سے بغلیں بجارہے ہیں تو دوسری طرف رینجرز کے سپاہی ایم کیوایم کے معصوم ارکان سینیٹ ، قومی اور صوبائی اسمبلی اور رہنماؤں کوگرفتارکرکے اس طرح جشن منارہے ہیں جیسے کہ انہوں نے کشمیر فتح کرلیاہو۔ انہوں نے مزید کہا کہ افسوس صد افسو س کہ ملکی وبین الاقوامی سطح کے معروف اور انتہائی جید آئینی و قانونی ماہرین رینجرز کی غیرقانونی حرکتوں پر ایک لفظ بھی بولنے سے کترارہے ہیں اور خاموش تماشائی بن کرآئین اورقانون کا مذاق اڑتا دیکھ رہے ہیں ۔ جناب الطاف حسین نے کہاکہ گزشتہ شب ایم کیوایم کے مرکز نائن زیرو پر رینجرز کے چھاپے اورگرفتاری کی وجہ یہ بتائی گئی ہے کہ الطاف حسین کی رینجرز کے خلاف تقریرپر کیف الورایٰ اور قمرمنصور نے تالیاں بجائی تھیں لہٰذا تالیاں بجانا غیرآئینی اورغیراخلاقی عمل ہے جس کے باعث انہیں دہشت گردی ایکٹ کے تحت گرفتارکیا گیا ہے۔ انہوں نے مزید کہاکہ رینجرز حکام کے اس طرح کے بیانات جب پوری دنیا میں جائیں گے اور جارہے ہیں اس سے پاکستان کی کتنی نیک نامی ہوگی اس کا اندازہ ہرپاکستانی بخوبی لگاسکتا ہے ۔ آخر میں جناب الطاف حسین نے ایم کیوایم کے تمام منتخب ارکان سینیٹ ، قومی وصوبائی اسمبلی ، ہمدرد ماؤں ، بہنوں ، بزرگوں ، نوجوان طلباء وطالبات اور بچوں سے اپیل کی کہ وہ موجودہ حالات میں ہرگز مایوس نہ ہوں اوراپنی صفوں میں اتحاد برقراررکھیں ۔