کراچی میں ایک ہفتے کے دوران تین مرتبہ بجلی کے طویل اور غیر اعلانیہ بریک ڈاؤن پر رابطہ کمیٹی کااظہار تشویش

کراچی ۔۔۔12، جولائی 2015ء 

متحدہ قومی موومنٹ کی رابطہ کمیٹی نے کراچی میں ایک ہفتے کے دوران تین مرتبہ بجلی کے طویل اور غیر اعلانیہ بریک ڈاؤن کی سخت ترین الفاظ میں مذمت کی اور تشویش کا اظہار کیا ہے اور کہا ہے کہ ملک کے سب سے بڑے صنعتی مرکز میں بجلی کا بحران برقرار رہنا کے الیکٹرک کی نااہلی اور مجرمانہ غفلت کا کھلا ثبوت ہے ۔ایک بیان میں رابطہ کمیٹی نے کہاکہ رمضان المبارک کے مقدس مہینے میں شدید گرمی کے دوران شہریوں کوبجلی کی لوڈشیڈنگ کے علاوہ طویل بریک ڈاؤن کا سامنا کرنا پڑ رہا ہے جس کے باعث شہریوں کی زندگی اجیرن بن کر رہ گئی ہے ۔ رابطہ کمیٹی نے کہاکہ شہر میں بجلی کی لوڈشیڈنگ کے خاتمے کیلئے عملی اقدامات کرنے کے بجائے شہریوں پر طویل دورانئے کا غیر اعلانیہ بریک ڈاؤن مسلط کرنا سراسر ظلم ہے ۔ رابطہ کمیٹی نے کہاکہ کراچی کے شہری ملک کو 70فیصد سے زائد ریونیو دیتے ہیں اور شہر میں کے الیکٹر ک کے خزانے میں ہر ماہ اضافہ ہورہاہے لیکن اس شہر کے بجلی ، پانی ، سیوریج ، گیس اور دیگر بنیادی مسائل کے حل کیلئے نہ تو متعلقہ اداروں کی جانب سے کوئی مثبت کام دیکھنے میں آرہے ہیں اور نہ ہی حکومت سندھ اور وفاقی حکومت کی جانب سے شہریوں کے بنیادی مسائل کے حل کیلئے سنجیدہ اور ٹھوس اقدامات کئے جارہے ہیں بلکہ حیرت انگیز طور پر خاموش تماشائی کا کردار ادا کیاجارہا ہے اور ایسا محسوس ہوتا ہے کہ صوبائی او وفاقی حکومت شہریوں کے ان بنیادی مسائل کے حل سے جان چھڑانا چاہتے ہیں ۔رابطہ کمیٹی نے کہاکہ شہر میں بجلی کی طویل ودرانئے کی لوڈشیڈنگ سے نہ صرف شہریوں کے معمولات زندگی بری طرح سے متاثر ہورہے ہیں بلکہ تجارتی ، کاروباری ، صنعتی سرگرمیاں بھی ماند پڑ گئی ہیں اور اسپتالوں ، مساجد اور دیگر اہم جگہوں پر بھی لوگوں کو شدید مایوسی کا سامنا کرنا پڑرہاہے جس کے باعث شہریوں کے صبر کا پیمانہ لبریز ہورہا ہے اور آئے دن شہریوں کی جانب سے بجلی او رپانی کی قلت پر احتجاجی مظاہرے کئے جارہے ہیں لیکن اس کے باوجود شہریوں کی کوئی سنوائی نہیں ہورہی ہے ۔ رابطہ کمیٹی نے کہا کہ وفاقی و صوبائی حکومت کراچی کے شہریوں کو بجلی کے بحران سے نکالنے میں مکمل طور پر ناکام ہوچکی ہے لہٰذاچیف جسٹس آف سپریم کورٹ مسئلے کے فوری حل کیلئے سوموٹو ایکشن لیں۔انہوں وزیراعظم نواز شریف اور وزیراعلیٰ سندھ قائم علی شاہ سے کہاکہ وہ شہریوں پر غیر اعلانیہ اور طویل ڈورانئے بریک ڈاؤن مسلط کرنے کا سختی سے نوٹس لیکر اور شہریوں کو بنیادی سہولیات کی فراہمی کیلئے ڈرائنگ روم اور ایئر کنڈیشن روم سے نکل کر عملی او رٹھوس اقدامات کئے جائیں ۔