گلزار ہجری میٹروول تھرڈ ، بلاک ون اینڈ ٹو اور اسکیم 33کے بیشتر علاقوں میں عوام بجلی کی لوڈ شیڈنگ کے عذاب سے بلبلا اٹھی ہے ، مزمل قریشی

کراچی :۔۔19؍ جون 2015ء 

متحدہ قومی موومنٹ کے حق پرست رکن قومی اسمبلی محمد مزمل قریشی نے کہا کہ اسکیم 33میں عوام بجلی کی لوڈ شیڈنگ کے غذاب سے بلبلا اٹھی ہے اور رمضان المبارک کے مقدس مہینے میں بھی بجلی اور پانی کی سہولتوں سے محروم ہیں ۔ انہوں نے مسائل کے حل کے لئے وزیراعظم میاں نوازشریف اور وزیراعلیٰ قائم علی شاہ سے پرزور اپیل کرتے ہوئے کہا کہ الیکٹرک کی نااہل انتظامیہ شدید گرمی اور رمضان المبارک کے مقدس مہینے کا بھی کوئی احترام نہیں کررہی ، غیر اعلانیہ لوڈ شیڈنگ اور ہزاروں لاکھوں روپے کا سرچ چارج لگاکر بل بھیجے جارہے ہیں۔سو فیصد ادائیگی کے باوجود سارا سارا دن لائٹ نہ ہونے کے باعث پانی سے بھی محروم ہوگئے ہیں عوام شدید پریشانی اور ذہنی اذیت کا شکار ہیں۔ انہوں نے کہا کہ بالخصوص گلزار ہجری ، میٹرووول تھرڈ بلاک ون اینڈ ٹو اور اسکیم 33کے بیشتر علاقوں میں غیر اعلانیہ طویل لوڈ شیڈنگ کے مسائل بہت بڑھ گئے ہیں ۔ اس کے علاوہ کے الیکٹرک کی انتظامیہ فالٹ کا بہانہ بناکر چوبیس چوبیس گھنٹے بجلی نہ صرف بند کردیتی ہے بلکہ شکایات لے کر جانے والے مکینوں کے ساتھ بھی انکارویہ قابل اعتراض ہے۔ انہو ں نے کہا کہ یہ مسائل توجہ طلب ہیں اور جلد از جلد اس مسئلے کے حل کے لئے اقدامات کرنے کی ضرورت ہے تاکہ لوگ لوڈ شیڈنگ کے غذاب سے بچیں اور اس عبادت کے مہینے کو سکون سے گزار سکیں۔