ایک ایک حق پرست پاکستانی کچھی برادری کے غم میں برابر کا شریک ہے، قائد تحریک الطاف حسین

لندن ۔۔۔11، جولائی2013ء

متحدہ قومی موومنٹ کے قائد جناب الطاف حسین نے لیاری کے مختلف علاقوں میں مسلح دہشت گردوں کی جانب سے کچھی برادری کے افراد پر جدید ترین ہتھیاروں سے پے درپے حملے کرنے اور کچھی برادری کے افراد کو ہلاک وزخمی کرنے کی شدیدالفاظ میں مذمت کی ہے ۔ ایک بیان میں جناب الطاف حسین نے دہشت گردی سے متاثرہ کچھی برادری کے سوگوارلواحقین سے دلی تعزیت کااظہار کرتے ہوئے کہاکہ ایک ایک حق پرست پاکستانی اور ایم کیوایم کا ایک ایک کارکن آپ کے غم میں برابر کاشریک ہے ۔ انہوں نے دہشت گردوں کی فائرنگ سے زخمی ہونے والے افراد کی جلد ومکمل صحت یابی کیلئے دعا بھی کی۔ 

جناب الطاف حسین نے ایم کیوایم کی رابطہ کمیٹی ، زونوں، سیکٹروں اور یونٹوں کے ذمہ داران کو ہدایت کی کہ لیاری میں دہشت گردی سے متاثرہ کچھی برادری کے خاندان اپنی جان ومال اور عزت وآبرو کے تحفظ کیلئے پورے سندھ میں جہاں جہاں عارضی پناہ گاہوں میں آباد ہوئے ہیں وہاں کا متعلقہ زون ، سیکٹر اور یونٹ کچھی مہاجرین کی ہرممکن مددکرے ۔ جناب الطاف حسین نے ٹھٹھہ ، بدین اور کراچی کے علاقے ملیر اوربلدیہ ٹاؤن سمیت تمام علاقوں کے مخیر حضرات سے پرزوراپیل کی کہ لیاری میں دہشت گردی کے باعث نقل مکانی کرنے والے کچھی برادری کے مہاجرین جہاں کہیں بھی عارضی پناہ کیلئے آباد ہوئے ہیں ان کے ساتھ بھرپورتعاون کیا جائے ، مخیرحضرات رمضان المبارک کے مقدس مہینے میں ان بے سہارا خاندانوں کی مدد کرکے ثواب دارین حاصل کریں۔