ماہر تعلیم، ممتاز سماجی کارکن اور ایم کیوایم کے فیڈرل بی ایریا ریزیڈینٹ کمیٹی کے رکن اظفر رضوی کے بہیمانہ قتل پر قائد تحریک الطاف حسین کا اظہار مذمت

لندن۔۔۔31،مئی2013ء

متحدہ قومی موومنٹ کے قائد جناب الطاف حسین نے ماہر تعلیم،ممتازسماجی کارکن ایم کیوایم فیڈرل بی ایریا سیکٹر اورفیڈرل بی ایریاریزیڈنٹ کمیٹی کے دیرینہ رکن پروفیسر اظفررضوی اورانکے ڈرائیور کے بہیمانہ قتل کی سخت ترین الفاظ میں مذمت کی ہے اورحکومت سے مطالبہ کیاہے کہ اظفررضوی شہید کے قاتلوں کوگرفتارکیاجائے۔ایک بیان میں جناب الطاف حسین نے کہاکہ پروفیسر اظفررضوی ایک انتہائی نفیس اورباکردار شخصیت اورسادہ طبیعت کے انسان تھے،وہ ادبی اورسماجی حلقوں میں ایک سرگرم شخصیت تھے اور ان کاقتل بڑاسانحہ اورادبی وسماجی حلقو ں اور تعلیم کے شعبے کاقابل تلافی نقصان ہے۔انہوں نے کہا کہ اظفررضوی اپنی ادبی اور سماجی سرگرمیوں کے ساتھ ساتھ ایم کیوایم کے پیغام کوپھیلانے میں بھی سرگرم عمل تھے اورایم کیوایم کی فلاحی سرگرمیوں میں بھی بڑھ چڑھ کرحصہ لیتے تھے۔ اظفررضوی جیسے شریف النفس اورتعلیم یافتہ شخص کونشانہ بنانے والے کسی بھی قیمت پر انسان کہلانے کے مستحق نہیں ۔ان درندوں نے صرف ایک گھر نہیں اجاڑاہے بلکہ انسانیت کوناقابل تلافی نقصان پہنچایا ہے ۔جناب الطاف حسین نے اظفررضوی شہیدکے سوگوار لواحقین سے دلی تعزیت وہمدردی کا اظہار کرتے ہوئے کہاکہ دکھ اورافسوس کی گھڑی میں مجھ سمیت ایم کیوایم کے تمام کارکنان آپکے غم میں برابرکے شریک ہیں ۔ انہوں نے دعاکی کہ اللہ تعالیٰ اظفر رضوی شہیدکواپنی جواررحمت میں اعلیٰ مقام عطافرمائے اورسوگوارلواحقین کو صبرجمل عطاکرے۔جناب الطاف حسین نے صدر مملکت آصف علی زرداری ، نگراں وزیراعظم میرہزار خان کھوسہ، نگراں وفاقی وزیرداخلہ ملک حبیب اور سندھ حکومت سے مطالبہ کیاکہ ایم کیوایم کے کارکن وماہرتعلیم اظفررضوی اورانکے ڈرائیور کے بہیمانہ قتل کافوری نوٹس لیاجائے اورقتل کی المناک واردات میں ملوث دہشت گردوں کوگرفتارکرکے سخت ترین سزادی جائے۔