ملک بھر خصوصاً سندھ کے عوام حق پرست امیدواروں کی انتخابات میں تاریخی فتح پر جمعہ کو یوم تشکر منائیں، الطاف حسین کی اپیل

لندن ۔۔16مئی 2013ء 

متحدہ قومی موومنٹ کے قائد جناب الطاف حسین نے ملک بھر کے عوام ،خصوصاً سندھ کے عوام سے اپیل کی ہے کہ وہ حق پرست امیدوار وں کی عام انتخابات میں تاریخی فتح پر جمعہ کو یوم تشکر منائیں اور نماز جمعہ کے بعد شکرانہ کے خصوصی نوافل اد ا کریں ۔ اپنے ایک بیان میں جناب الطاف حسین نے کہا کہ حالیہ انتخابات میں ایم کیوایم کو بزور طاقت حصہ لینے سے روکنے کی کوششیں کی گئیں ۔بم دھماکوں اور دہشت گردی کر کے ایم کیوایم کے سینکٹروں کارکنوں او رہمدردوں کو شہید وزخمی کیا گیا ، خوف و دہشت کا ماحول پید اکر کے ایم کیوایم کو آزادانہ طریقہ سے انتخابی مہم چلانے سے روکا گیا لیکن ان تمام تر رکاؤٹوں اور سازشوں کے باوجود عوام نے بڑی تعداد میں الیکشن والے دن باہر نکل کر ایم کیوایم کو ووٹ دیکر ایک بار پھر اس پر اپنے اعتماد کا اظہار کیا ۔جناب الطاف حسین نے عوام سے اپیل کی کہ وہ جمعہ کو نماز جمعہ کے اجتماعات کے بعد اللہ تعالیٰ کے حضور شکرانے کے خصوصی نوافل ادا کر یں اور حق پرستوں کی کامیابی پر اللہ تعالیٰ کا شکر بجالائیں ۔جناب الطاف حسین نے ایم کیوایم کے ذمہ داروں وکارکنوں، خصوصاًنو منتخب اراکین اسمبلی کو ہدایت کی کہ وہ جمعہ کو یوم تشکر کے موقع پر شہداء کے گھروں پر جاکر ان کے لواحقین کا غم بانٹیں ،شہداء کی قبروں پر حاضری دیکر وہاں پھول چڑھائیں اور خدا کے حضور دعا کریں کہ وہ حق پرستی کی اس تحریک کو اس کے مقاصد میں کامیابی عطا کرے (آمین )