تحریک نفاذ فقہ جعفریہ کا حلقہ این اے 246میں حق پرست امیدوار کنور نوید جمیل ایڈووکیٹ کی حمایت کا اعلان

کراچی ۔۔۔19اپریل 2015ء

تحریک نفاذ فقۂ جعفریہ نے حلقہ این اے 246کیلئے نامز د امیدوار کنور نوید جمیل ایڈووکیٹ کو ضمنی انتخابات میں اپنی بھر پور حمایت کی یقین دہانی کروائی ہے ۔کنور نوید جمیل کی حمایت کا اعلان تحریک نفاذ فقہ جعفریہ کے وفد نے خورشید بیگم سیکریٹریٹ ، عزیزآباد میں حق پرست نامزد امیدوار سے ملاقا ت کے دوران کیا ۔اس موقع پر ایم کیو ایم کی علماء کمیٹی کے انچارج جاوید احمد و اراکین بھی انکے ہمراہ تھے جبکہ تحریک نفاذ فقہ جعفریہ کے وفد میں چےئر مین پولیٹیکل سیل سندھ سید انور حسین جعفری، صوبائی صدر سندھ علامہ سید وقار حسن تقوی،کراچی ڈویژن کے صدر سید بدر علی تر مذی، علامہ ڈاکٹر صفدر حسین رضوی، مولانا جمشید نقوی اور منیر حسین نقوی شامل تھے۔وفد سے گفتگو کرتے ہوئے کنور نوید جمیل نے تحریک نفاذ فقہ جعفریہ کے تمام رہنماؤں کارکنان اور کراچی میں بسنے والی اہل تشیع برادری کا شکریہ اداکیا اور انہیں یقین دلایا کہ جناب الطاف حسین کے منتخب امیدوارا ن ماضی کی طرح آئندہ بھی ہر کٹھن وقت میں انکے شانہ بشانہ کھڑے رہیں گے ۔انہوں نے کہا کہ حلقہ 246کی سیٹ پر انکی کامیابی صرف ایک فرد کی نہیں بلکہ جناب الطا ف حسین اور انکے چاہنے والوں کی جیت ہوگی ۔اس موقع پر تحریک نفاذ فقہ جعفریہ کے وفد نے کہا کہ ایم کیو ایم کے مقابلے پر کھڑی ہونے والی جماعت اسلامی اور پاکستان تحریک انصاف در اصل طالبان اور القائدہ کی حامی جماعتیں ہیں جنہیں حلقہ این اے246 کی اہل تشیع سمیت تمام پر امن برادری کسی صورت ووٹ نہیں دیں گے ۔ انہوں نے کہا کہ ایم کیو ایم ہی ملک کی واحد سیاسی جماعت ہے جو کراچی سمیت ملک بھر میں مذہبی رواداری اور اتحاد بین المسلمین کے فروغ کیلئے کوشاں ہے اور اس ضمن کوئی لیڈر میں جناب الطاف حسین کا ثانی نہیں ہے۔