میڈیا کے نمائندے تنقید کریں لیکن ریٹنگ بڑھانے کیلئے جھوٹے الزامات لگا کر پگڑیاں نہ اچھالیں ، الطاف حسین

کراچی ۔۔۔18، اپریل 2015ء 

متحدہ قومی موومنٹ کے قائد جناب الطاف حسین نے میڈیا کے نمائندوں سے کہا ہے کہ آپ الطاف بھائی اورایم کیوایم پر جتنی چاہیں تنقید کریں یہ آپ کا حق ہے ، ہم آپ کے اس حق کا احترام کرتے ہیں لیکن خدارا ریٹنگ بڑھانے کی خاطر یا پسند نہ پسند کی بنیاد پر جھوٹے الزامات لگا کر لوگوں کی پگڑیاں نہ ا چھالیں ۔ وہ ہفتہ کی شب لیاقت آباد فلائی اوور پر این اے 246کی نشست پر ہونے والے ضمنی الیکشن کے سلسلے میں منعقدہ جلسہ کے شرکاء سے خطاب کررہے تھے ۔ انہوں نے کارکنان و عوام کو مخاطب کرتے ہوئے کہاکہ آج 18تاریخ ختم ہونے کو ہے ، چار دن رہ گئے ہیں کوئی گالی دے ، تنگ کرے آپ صبر کرلیجئے ، تین چار دن کی بات ہے اور صبر کرلیں اللہ آپ کے صبر کا پھل 23تاریخ کو انشاء اللہ جیت کی صورت میں دیگا ۔