ایم کیوایم کے قائد الطاف حسین کی اے این پی سندھ کے صدر سینیٹر شاہی سید سے فون پر گفتگو، اے این پی کے امیدوار صادق زمان خٹک اور انکے کم سن بچے کی شہادت پر افسوس کا اظہار کیا

لندن ۔۔۔ 3 مئی 2013ء

متحدہ قومی موومنٹ کے قائد جناب الطاف حسین نے کہاہے کہ جن لوگوں نے اے این پی کے قومی اسمبلی کے امیدوار کورنگی میں اے این پی کے امیدوار صادق زمان خٹک اور انکے کم سن بچے کوشہیدکیاہے وہ اللہ تعالیٰ کے عذاب سے ہرگزنہیں بچ سکیں گے ۔ جناب الطاف حسین نے یہ بات جمعہ کی شب اے این پی سندھ کے صدرسینیٹرشاہی سیدسے فون پر گفتگوکرتے ہوئے کہی۔ جناب الطاف حسین نے شاہی سید سے صادق زمان خٹک اور انکے کم سن بچے کی شہادت پر دلی تعزیت کااظہارکرتے ہوئے کہاکہ میں اورمیرے تمام ساتھی شہید کے سوگوار لواحقین اوراے این پی کے رہنماؤں اورکارکنوں کے غم میں برابر کے شریک ہیں۔ انہوں نے کہاکہ دہشت گردی کے ان واقعات نے ماضی میں ہمارے مابین اختلافات پیداکرنے والوں کوبے نقاب کردیاہے اورہماری اس بات کی تصدیق ہوگئی ہے کہ ماضی میں بھی کون لوگ ایم کیوایم اوراے این پی کے خلاف کارروائیوں میں ملوث رہے ہیں۔ سینیٹرشاہی سیدنے جناب الطاف حسین کاشکریہ اداکرتے ہوئے ان سے ایم کیوایم کے کارکن عادل رضوان کی شہادت اوربرنس روڈ پر ایم کیوایم کے دفترپر حملے کے واقعہ کی مذمت کی۔ انہوں نے کہاکہ دونوں جماعتوں کونشانہ بنانے والے ناسور ہیں جوپاکستان اوراسلام دونوں کوتباہ کرنا چاہتے ہیں۔ سینیٹرشاہی سید نے جناب الطاف حسین کی اس بات سے اتفاق کیاکہ پختونوں اوراردوبولنے والوں کولڑانے والے بے نقاب ہوگئے ہیں جس سے امن پسند اورتعلیم یافتہ طبقہ کوتقویت ملی ہے ۔