ایم کیوایم کے قائد الطاف حسین اور سابق صدر مملکت آصف علی زرداری کے درمیان ٹیلی فون پر گفتگو
بین الاقوامی سیاسی صورتحال، ملک کی مجموعی سیاسی، معاشی اور امن و امان کی صورتحال پر تبادلہ خیال
دونوں رہنماؤں کا یمن اور سعودی عرب کی تازہ ترین صورتحال پر خصوصی تبادلہ خیا ل
سعودی عرب اور یمن کے تنازعہ میں پاکستان کی شمولیت یا عدم شمولیت کا جائزہ لینے کیلئے فوری طور پر کل جماعتی کانفرنس بلانے کی ضرورت ہے
وہ فیصلہ کیا جائے جو صرف اور صرف پاکستانی مفادات کے مطابق ہو، دونوں رہنماؤں میں اتفاق
لندن۔۔۔27، مارچ 2015ء
متحدہ قومی موومنٹ کے قائد جناب الطاف حسین اور سابق صدر پاکستان وپیپلزپارٹی کے شریک چیئرمین جناب آصف علی زرداری کے درمیان ٹیلی فون پرگفتگو ہوئی ۔دونوں رہنماؤں کے درمیان ہونے والی گفتگو میں ملکی و بین الاقوامی صورتحال ، ملک کی مجموعی سیاسی، معاشی اور امن وامان کی صورتحال اور باہمی دلچسپی کے دیگر امور پر تبادلہ خیال کیا گیا۔دونوں رہنماؤں نے اپنی گفتگو میں بالخصوص سعودی عرب اور یمن کی صورتحال کے بارے میں تفصیلی تبادلہ خیال کیا اور اس بات پر اتفاق کیا گیا کہ اس تنازعہ میں پاکستان کی شمولیت یا عدم شمولیت کا جائزہ لینے کیلئے فوری طورپر کل جماعتی کانفرنس ، اے پی سی بلانے کی ضرورت ہے خواہ وہ پیپلزپارٹی ہی کی جانب سے کیوں نہ ہو۔ ضرورت اس بات کی ہے کہ کل جماعتی کانفرنس میں موجودہ ملکی وبین الاقوامی صورتحا ل بالخصوص موجودہ صورتحال میں پاکستان کی شمولیت یاعدم شمولیت کے بارے میں بحث کی جائے اور وہ فیصلہ کیاجائے جو صرف اور صرف پاکستانی مفادات کے مطابق ہو۔ اس موقع پر دونوں رہنماؤں نے ایک دوسرے کی خیریت دریافت کی اور ایک دوسرے کی صحت وتندرستی کیلئے نیک خواہشات کا بھی اظہار کیا۔