دہشت گردوں کی فائرنگ سے پاکستان بازار تھانہ کے ہیڈ محرر سید مرتضی حسن رضوی کے بہیمانہ قتل پر ایم کیوایم رابطہ کمیٹی کا اظہار مذمت

کراچی ۔۔۔15، اپریل 2013ء 

متحدہ قومی موومنٹ کی رابطہ کمیٹی نے دہشتگردوں کی فائرنگ سے تھانہ پاکستان بازار کے ہیڈ محرر سید مرتضی حسن رضوی کے بہیمانہ قتل کی سخت ترین الفاظ میں مذمت کی ہے اور بہیمانہ قتل کی اس واردات کو فرقہ وارانہ ہم آہنگی کی فضا خراب کرکے شہر کا امن اور انتخابی ماحول کوسبوتاژ کرنے کی گھناؤنی سازشوں کا تسلسل قرار دیا ہے ۔ ایک بیان میں رابطہ کمیٹی نے کہاکہ فرقہ واریت کی بنیاد پر بے گناہ افراد کو خاک و خون میں نہلانے والے سفاک دہشت گرد انسانیت اوراتحاد بین المسلمین کے کھلے دشمن ہیں ۔ رابطہ کمیٹی نے سید مرتضیٰ حسن رضوی شہید کے تمام سوگوار لواحقین سے دلی تعزیت وہمدردی کااظہار کرتے ہوئے دعا کی کہ اللہ تعالیٰ شہید کوجنت الفردوس میں اعلیٰ مقام عطا فرمائے اور سوگواران کو صبرجمیل عطا کرے ۔ رابطہ کمیٹی نے صدر مملکت آصف علی زرداری ، نگراں وزیراعظم میر ہزار خان کھوسو ، نگراں وفاقی وزیر داخلہ ملک حبیب ، گورنر سندھ ڈاکٹر عشرت العباد اور نگراں وزیراعلیٰ سندھ جسٹس (ر) زاہد قربان علوی سے مطالبہ کیا کہ فرقہ واریت کی بنیاد پر مسلح دہشت گردوں کی فائرنگ سے پاکستان بازار تھانہ کے ہیڈ محرر سید مرتضی حسن رضوی شہید کے بہیمانہ قتل کا سنجیدگی سے نوٹس لیاجائے ، فرقہ واریت میں ملوث سفاک دہشت گردوں کے خلاف کارروائی عمل میں لاکر سید مرتضی حسن رضوی شہید کے درندہ صفت قاتلوں کو جلد از جلد کیفر کردار تک پہنچایاجائے ۔