ایم کیوایم میر پور خاص زون کے زیر اہتمام آج بعد نماز عشاء بلدیہ کمپلیکس میرپور خاص میں عظیم الشان محفل ذکر مصطفی ؐمنعقد کی جارہی ہے

میرپور خاص ۔۔۔ 19فروری2015ء

متحدہ قومی موومنٹ کے میر پور خاص زون کے زیر اہتمام آج19 فروری 2015 کو بعد نماز عشاء بلدیہ کمپلیکس میرپور خاص میں ایک عظیم الشان محفل ذکر مصطفی ؐمنعقد کی جارہی ہے ۔یہ اعلان ایم کیوا یم کی سندھ تنظیمی کمیٹی کے رکن شریف خان ،رشید بھیا،میر پور خاص کے زونل انچارج مجیب الحق و اراکین زونل کمیٹی نے میر پور خاص میں ایک پریس کانفرنس میں کیا۔ انہوں نے کہا کہ جناب الطاف حسین کی ہدایت پر میر پور خاص کے عوام کیلئے اس عظیم الشان محفل ذکر مصطفی ؐکا انعقاد کیا جارہا ہے جس کا بنیادی مقصد وگرام کا مقصد حضورؐکے اخلاق حسنہ کی تعلیم کو اُ جاگر کر کے ملک میں امن امان باہمی محبت اخوت بھائی چارہ یگانگت کو فروغ دینا ہے اور فرقہ پرستی مسلکی اختلافات میں ہم آہنگی پیدا کرنا اور دہشت گردی کے خاتمے کیلئے نبی کریم ؐکے عملی نمونے کو پیش کرنا ہے ۔انہوں نے کہا کہ اس پروقار محفل میں بین الاقوامی شہرت یافتہ ثناء خواں قاری وحید ظفر قاسمی ،صدیق اسماعیل ،الحاج عمران شیخ ،توصیف رضا ،آغا علی گوہر ،نظیر فریدی ،زوہیب اشرفی اور علیم الدین علیم و دیگر اور بین الاقوامی شہرت کے حامل معروف قوال امجد صابری وہمنوا بارگاہ رسالت میں گلہائے عقیدت پیش کریں گے۔ انہوں نے کہاکہ جناب الطاف حسین کی ہمیشہ کوشش رہی ہے کہ ملک سے انتہا پسندی، دہشت گردی فرقہ پرستی کی لعنت کوجڑ سے اکھاڑ پھینکا جائے اورپاکستان میں بھائی چارگی کو فروغ دیکر اسے امن و آشتی کا گہوارۂ بنایا جائے ۔ انہوں نے پریس کانفرنس کے اختتام پر میر پور خاص کے عوام اور صحافی برادری کو محفل میلادؐ میں خصوصی شرکت کی دعوت بھی دی ۔