برطانیہ میں مقیم پاکستانیوں کوپاکستان کے ویزوں اورشناختی کارڈز کے حصول کیلئے حائل دشواریوں کاخاتمہ کیاجائے۔الطاف حسین

لندن۔۔۔11 فروری 2015ء

متحدہ قومی موومنٹ کے قائدجناب الطاف حسین نے حکومت پاکستان سے مطالبہ کیاہے کہ برطانیہ میں مقیم پاکستانیوں کوپاکستان کے ویزوں اورشناختی کارڈز کے حصول کیلئے حائل دشواریوں کاخاتمہ کیاجائے ۔انہوں نے یہ بات ایم کیوایم انٹرنیشنل سیکریٹریٹ میں برطانیہ میں آبادکشمیری کمیونٹی سے تعلق رکھنے والے ایک وفدسے گفتگوکرتے ہوئے کہی۔ وفدکی قیادت شیفیلڈکی کشمیری کمیونٹی کے رہنمامنشاء خان کررہے تھے۔وفدنے جناب الطاف حسین کوبتایاکہ برطانیہ کے مختلف شہروں میں مقیم پاکستانیوں اورکشمیری کمیونٹی سے تعلق رکھنے والے افرادکوپاکستان کے ویزے پہلے ہائی کمیشنزاورپاکستانی قونصلیٹس سے براہ راست جاری کیے جاتے تھے لیکن کچھ عرصہ سے برطانیہ میں آبادپاکستانیوں کوویزوں کے حصول کیلئے جیری سروس سے رجوع کرناپڑتاہے ۔ اس سروس کی وجہ سے ویزے کے حصول میں نہ صرف کئی کئی ماہ کی غیرضروری تاخیر اور رکاوٹوں کاسامناکرناپڑتاہے بلکہ ویزے کی فیس میں بھی اضافہ کردیاگیا ہے ۔ جناب الطاف حسین نے برطانیہ میں آبادپاکستانیوں اورکشمیری کمیونٹی کوویزے اورشناختی کارڈ کے حصول میں درپیش دشواریوں اوررکاوٹوں پرشدیدافسوس کااظہار کیا اورحکومت پاکستان سے مطالبہ کیاکہ ویزوں کے اجراء کے سلسلے میں جیری سروس کاسلسلہ ختم کرکے ہائی کمیشن اورقونصلیٹس سے براہ راست ویزے جاری کئے جائیں اورویزوں اورشناختی کارڈ کے اجراء میں تاخیری حربے ختم کئے جائیں۔