رشتہ داروں ، دوست احباب ، دولت مندوں ، جاگیرداروں اور بڑے سرمایہ داروں کے بجائے اپنے کارکنوں کو ٹکٹ دے کر ان کی قربانیوں کو تسلیم کرنے کا عمل کیاجائے

لندن۔۔۔30، مارچ2013ء 

متحدہ قومی موومنٹ کی رابطہ کمیٹی کے ارکان سلیم شہزاد ، طارق جاوید ، سید قاسم علی رضا اور محمد اشفاق نے اپنے ایک مشترکہ بیان میں مسلم لیگ (ن) کے رہنماؤں سمیت ملک بھر کی تمام سیاسی اور مذہبی جماعتوں کے رہنماؤں سے درد مندانہ اپیل کی ہے کہ کسی بھی سیاسی اور مذہبی جماعت کی ریڑھ کی ہڈی اس کے کارکن ہوتے ہیں جو کڑی آزمائشوں اور مشکلات میں بڑی بڑی قربانیاں دیتے ہیں ، رات دن محنت کرتے ہیں ، جیل کی صعوبتیں برداشت کرتے ہیں ، اپنی جانوں کی قربانیاں دیتے ہیں ایسے کارکنوں کو انتخابات کے وقت انتخابی ٹکٹ دینے میں عموما نظر انداز کیا جاتا ہے جو کہ انتہائی افسوسناک امر ہے ۔ اراکین رابطہ کمیٹی نے کہاکہ ٹکٹوں کے اصل حقدار قربانیاں دینے والے کارکن ہوتے ہیں لہٰذا ہم تمام سیاسی اور مذہبی جماعتوں کے رہنماؤں سے اپیل کرتے ہیں کہ خدارا رشتہ داروں ، دوست احباب ، دولت مندوں ، جاگیرداروں اور بڑے سرمایہ داروں کے بجائے اپنے کارکنوں کو ٹکٹ دے کر ان کی قربانیوں کو تسلیم کرنے کا عمل کیاجائے تاکہ کارکنان دل شکنی اور دل آزاری کا شکار نہ ہوں ۔ اراکین رابطہ کمیٹی نے امید ظاہر کی کہ تمام سیاسی اور مذہبی جماعتوں کے سربراہ ہماری اس درد مندانہ اپیل کو مد نظر رکھتے ہوئے اپنے کارکنان کو ان کے حق سے محروم نہیں کریں گے ۔