ساؤتھ ایشیا میں بھارت کی اجارہ داری قائم کرنے کی سازش کی جارہی ہے، الطاف حسین

لندن۔۔۔21، جنوری2015ء

متحدہ قومی موومنٹ کے قائد جناب الطاف حسین نے کہاہے کہ بین الاقوامی منصوبے کے تحت ساؤتھ ایشیا میں بھارت کی اجارہ داری قائم کرنے کی سازش کی جارہی ہے اور پاکستان میں مذہبی منافرت اور فرقہ واریت کی آگ بھڑکاکر پاکستان کو غیرمستحکم کرنے کا عمل اسی سازش کا حصہ ہے، ان حالات میں پاکستان سے محبت کرنے والے ہر شہری کو متحد ہوکر دہشت گردی کے خلاف جنگ میں مسلح افواج کا ساتھ دینا چاہیے اور آرمی چیف جنرل راحیل شریف سے کھل کر مطالبہ کرنا چاہیے کہ وہ کھل کر ملک کا انتظام سنبھالیں۔

یہ بات انہوں نے ڈسٹرکٹ راولپنڈی کے ذمہ داران ،کارکنان اور خواتین کارکنان کی فکری نشست سے ٹیلی فونک خطاب کرتے ہوئے کہی۔ اس موقع پر ایم کیوایم پنجاب کے صدر میاں عتیق بھی موجود تھے۔ جناب الطاف حسین نے ’’ایثاروقربانی اور احساس ذمہ داری ‘‘ کے موضوع پراپنے خطاب میں ملک کی مجموعی صورتحال اور ملک کو درپیش چیلنجوں پر بھی اظہار خیال کیا۔ اپنے خطاب میں جناب الطاف حسین نے کہاکہ فرانس میں گستاخانہ خاکوں کی اشاعت قابل مذمت ہے ، فرانس ،مسلم ملک نہیں ہے لیکن فرانس سمیت تمام ممالک کو دیگر مذاہب کے لوگوں کے جذبات کا احساس کرنا چاہیے اور کسی بھی مذہب کی مقدس ہستیوں کا مذاق نہیں اڑانا چاہیے ۔ انہو ں نے کہاکہ پاکستان میں گستاخانہ خاکوں کی اشاعت پر مذہبی جماعتیں جلسہ جلوس نکال رہی ہیں جبکہ پاکستان میں طالبان دہشت گردوں نے آرمی پبلک اسکول پشاورپر حملہ کرکے ڈیڑھ سو بچوں کو گولیاں مارکرشہید کردیا ، متعدد بچوں کو ذبح کردیا، کامرہ ائیربیس، نیول ائیربیس، جی ایچ کیو ہیڈکوارٹر، سی آئی اے ، ایف آئی کی عمارت، آئی ایس آئی کے دفتر، کراچی ائیرپورٹ ، مساجد، امام بارگاہوں ، اسکولوں اوربازاروں پر حملے کرکے ہزاروں بے گناہ سویلین اور فوجیوں کو شہید وزخمی کردیا لیکن ان مذہبی جماعتوں کی جانب سے طالبان کی دہشت گردی اور قتل وغارتگری کے خلاف کوئی احتجاجی مظاہرہ نہیں کیاجاتا۔ جناب الطاف حسین نے کہاکہ اسلام آباد کی لال مسجد کے خطیب کے خلاف ایف آئی آر درج ہے لیکن اسے گرفتارنہیں کیاجاتا، کالعدم تنظیمیں نام بدل بدل کر کام کررہی ہیں اوران تنظیموں کے رہنماء کھلے عام جلسہ جلوس میں تقاریر کررہے ہیں لیکن ان کے خلاف کوئی قانونی کارروائی نہیں کی جاتی ۔ جناب الطاف حسین نے کہاکہ بین الاقوامی منصوبے کے تحت ساؤتھ ایشیا میں بھارت کی اجارہ داری قائم کرنے کی سازش کی جارہی ہے اور پاکستان میں مذہبی منافرت اور فرقہ واریت کی آگ بھڑکاکر پاکستان کو غیرمستحکم کرنے کا عمل اسی سازش کا حصہ ہے ۔جناب الطاف حسین نے کہاکہ ان حالات میں پاکستان سے محبت کرنے والے ہر شہری کو متحد ہوکر دہشت گردی کے خلاف جنگ میں مسلح افواج کا ساتھ دینا چاہیے اور آرمی چیف جنرل راحیل شریف سے کھل کر مطالبہ کرنا چاہیے کہ وہ کھل کر ملک کا انتظام سنبھالیں۔ جناب الطاف حسین نے کہاکہ ایم کیوایم ، پاکستان سے فرسودہ جاگیردارانہ ، وڈیرانہ اور بے لگام سرمایہ دارانہ نظام کاخاتمہ چاہتی ہے، ایم کیوایم چاہتی ہے کہ ملک سے چند مخصوص خاندانوں کی اجارہ داری اور موروثیت کاخاتمہ ہو اور ملک پرغریب ومتوسط طبقہ کے تعلیم یافتہ ، باصلاحیت اور ایماندار افراد کی حکمرانی قائم ہو۔ اس کیلئے غریب ومتوسط طبقہ کے عوام کو ایثار وقربانی کے جذبے اور احساس ذمہ داری کے ساتھ اپنے اپنے فرائض ادا کرنے ہوں گے۔جناب الطاف حسین نے ایم کیوایم کے تمام ذمہ داران اور کارکنان پر زور دیا کہ وہ ایثاروقربانی اور احساس ذمہ داری کے ساتھ اپنے تنظیمی فرائض ادا کریں، صوبہ پنجاب کے تمام اضلاع میں حق پرستانہ پیغام کے فروغ کیلئے محنت ولگن سے کام کریں اور عوام الناس کی خدمت کیلئے اپنا بھرپورکردار ادا کریں۔