ایم کیوایم ملیرسیکٹرکے کارکن فرازعالم کی پولیس حراست میں بدترین تشدد کے ذریعے قتل اور اورنگی ٹاؤن میں کارکن ندیم احمد کے مذہبی انتہا پسند دہشت گردوں کے ہاتھوں قتل کے خلاف کل بروز اتوار کو ملک بھرمیں پرامن یوم سوگ منایا جائے گا

کراچی ۔۔۔ 10 جنوری 2015ء

متحدہ قومی موومنٹ کی رابطہ کمیٹی کاایک ہنگامی اجلاس ہواجس میں ایم کیوایم ملیرسیکٹرکے کارکن فرازعالم کی پولیس حراست کے دوران بدترین تشددکے ذریعے ماورائے عدالت قتل اورایم کیوایم اورنگی ٹاؤن سیکٹرکے کارکن ندیم احمدکی مذہبی انتہا پسند دہشت گردوں کے ہاتھوں قتل کی شدید الفاظ میں مذمت کی گئی۔ رابطہ کمیٹی نے فیصلہ کیاہے کہ ایم کیوایم کے کارکن فرازعالم کے ماورائے عدالت قتل اور ندیم احمد کے قتل کے خلاف کل بروز اتوار کو ملک بھرمیں پرامن یوم سوگ منایا جائے گا۔ یوم سوگ کے سلسلے میں سندھ بھرمیں ٹرانسپورٹ اور کاروباری وتجارتی سرگرمیاں بندرکھی جائیں گی جبکہ پنجاب، بلوچستان، خیبرپختونخوا، گلگت بلتستان اورآزاد کشمیرمیں احتجاجی مظاہرے کئے جائیں گے۔رابطہ کمیٹی نے کراچی سمیت سندھ بھرکے تمام دکانداروں ، تاجروں اور کاروباری حضرات سے اپیل کی ہے کہ وہ پولیس کے اس ظلم کے خلاف بطوراحتجاج اپنی دکانیں اورکاروباربندرکھیں اوراس ظلم کے خلاف اپنا احتجاج ریکارڈ کرائیں۔ رابطہ کمیٹی نے سندھ بھر کے ٹرانسپورٹرز حضرات سے بھی اپیل کی ہے وہ اس ظلم کے خلاف ٹرانسپورٹ بندرکھ کر مظلوموں کا ساتھ دیں۔