متحدہ قومی موومنٹ کی رابطہ کمیٹی کے اراکین نے سانحہ عباس ٹاؤن میں شہید ہونیوالے افراد کے لواحقین سے ان کے گھر وں پر جاکر تعزیت اور فاتحہ خوانی کی

کراچی ۔۔۔04، مارچ2013ء 

متحدہ قومی موومنٹ کی اراکین رابطہ کمیٹی کے ارکان شاہد لطیف اور جاوید کاظمی نے گذشتہ روز سانحہ عباس ٹاؤن میں شہید ہونے والے افراد کے گھر جاکرایم کیو ایم کے قائد جناب الطاف حسین کی جانب سے تعزیت کی اور شہداء کے بلند درجات کے لئے فاتحہ خوانی کی ۔اراکین رابطہ کمیٹی کے اراکین نے عباس ٹاؤن کے اندوہناک سانحے کے نتیجے میں شہید ہونے والے نارتھ ناظم آباد میں کاشف رضا اور نیو کراچی کے جلال الدین اورمحمد سہیل کے گھر جاکرشہداء کے تمام سوگوار لواحقین سے دلی تعزیت وہمدردی کااظہارکرتے ہوئے انہیں اپنے مکمل تعاون کی یقین دہانی کروائی ۔اراکین نے شہداء کے لواحقین سے کہا کہ دکھ کی اس گھڑی میں ایم کیو ایم کے تمام کارکنان آپ کے غم میں برابر کے شریک ہیں۔سوگوار لواحقین نے اس موقع پر ایم کیو ایم کے نمائندوں سے گفتگو کرتے ہوئے کہا کہ مصیبت کی اس گھڑی میں ہمارے دکھوں میں شریک ہونے پرہم اپنے تہہ دل سے متحدہ قومی موومنٹ کے قائد جناب الطاف حسین اور ایم کیو ایم کے نمائندوں کا شکریہ ادا کرتے ہیں ۔اس موقع پرکراچی تنظیمی کمیٹی کے ذمہ داران اور حق پرست رکن صوبائی اسمبلی خواجہ اظہار الحسن کے علاوہ متعلقہ سیکٹرز کے ذمہ داران و کارکنان بھی انکے ہمراہ موجود تھے۔ اراکین رابطہ کمیٹی نے دعا کی کہ اللہ تعالیٰ شہداء کو جنت الفردوس میں اعلیٰ مقام عطا فرمائے اور سوگواران کوصبرجمیل عطاکرے۔(آمین)