حافظ حسین احمد قرآن و حدیث کی روشنی میں جناب الطاف حسین کے بیان کا مطالعہ کرکے حقائق پر بات کریں ، حق پرست ارکان صوبائی اسمبلی

کراچی ۔۔۔23دسمبر2014ء

حق پرست ارکان صوبائی اسمبلی نے جمعیت علما ء اسلام کے مرکزی رہنما حافظ حسین احمد کی جانب سے جناب الطاف حسین کے لال مسجد سے متعلق بیان کو سیاق و سباق سے ہٹ کر پیش کرنے پر گہری تشویش کا اظہار کیا ہے ۔اپنے مشترکہ بیان میں انہوں نے کہا کہ جناب الطاف حسین نے قرآن مجیدکی 63ویں سورہء المنافقون اورسورۃ نمبر9 سورۃ توبہ میں آیت نمبر107سے 110 منافقوں کی تعمیرکردہ مسجد ضرار کے متعلق واقعہ بیان کیاتھاجو درحقیقت اسلام اورمسلمانوں کونقصان پہنچانے کیلئے قائم کی گئی تھی جس کے بعد نبیﷺؐؐ نے اللہ تعالیٰ کے حکم سے صحابہ کرامؓ کومنافقوں کی بنائی ہوئی اس مسجد کو ڈھانے کاحکم دیاتھا ۔حق پرست ارکان صوبائی اسمبلی نے کہاکہ اسلام اورمسلمانوں کونقصان پہنچانے کادرس اور تبلیغ کرنے والوں کیخلاف کار روائی کا مطالبہ کسی طور بھی غلط نہیں ہے حافظ حسین احمد قرآن و حدیث کی روشنی میں جناب الطاف حسین کے بیان کا مطالعہ کرکے حقائق پر بات کریں اور لوگوں کو گمراہ کرنے کا عمل ترک کردیں کیونکہ ایسا عمل دین کی خدمت نہیں بلکہ دین کو مزید نقصان پہنچانے کے مترادف ہے ۔