واقعہ کربلاحق اورباطل کاایک ایسادلخراش معرکہ ہے جسے رہتی دنیاتک فراموش نہیں کیا جاسکتا ۔ الطاف حسین

لندن۔۔۔3،نومبر2014ء 

متحدہ قومی موومنٹ کے قائد جناب الطاف حسین نے کہا ہے کہ واقعہ کربلاحق اورباطل کاایک ایسادلخراش معرکہ ہے جسے رہتی دنیاتک فراموش نہیں کیا جاسکتا ۔ یوم عاشور کے موقع پر اپنے بیان میں انہوں نے کہا کہ نواسہ رسول ﷺ حضرت امام حسینؓ ، اہل ابیت ؓ اور ان کے رفقاء نے اسلام کی بقاء اور حق کی سربلندی کی خاطراپنا سرکٹانا قبول کرلیا ،اپنے پورے گھرکی قربانی دینامنظورکرلیالیکن باطل پرست یزیدکی بیعت کرنامنظورنہیں کیا اورظالم و جابر قوتوں کے آگے سرخم نہیں کیا ۔ انہوں نے کہا کہ سیدالشہداء حضرت امام حسینؓ اوراہل بیت اطہارنے اسلام کی بقاء اورحق کی خاطر میدان کربلامیں جولازوال قربانیاں دیں، تسلیم ورضا، صبرواستقامت،عزم وہمت اورایثاروقربانی کی جولازوال مثال قائم کی اسے رہتی دنیاتک فراموش نہیں کیاجاسکتا، امام حسینؓ ، اہل بیت اوران کے رفقاء کی قربانیاں ہمیشہ حق کے راستے پر چلنے والوں کیلئے مشعل راہ کی حیثیت رکھتی ہیں۔ جناب الطاف حسین نے کہاکہ حضرت امام حسینؓ اوراہل بیت نے میدان کربلامیں لازوال قربانیاں دیکرپوری انسانیت کویہ درس دیاہے کہ ظالم چاہے کتناہی طاقتورکیوں نہ اورحق کی راہ پر چلنے والے تعدادمیں چاہے کتنے ہی قلیل اورکمزورکیوں نہ ہوں ،حق پرستی کاتقاضہ ہے کہ کسی بھی قیمت پر باطل پرست قوتوں کی بیعت نہ کی جائے اورحق او رسچ کی راہ میں بڑی سے بڑی قربانی دینے سے بھی دریغ نہ کیاجائے۔انہوں نے مزید کہا کہ حضرت امام حسینؓ اور اہل بیتؓ سے عقیدت و محبت کا تقاضہ ہے کہ ان کی تعلیمات پراصل روح کے مطابق مکمل عمل کیاجائے اور باطل قوتوں کے بجائے اہل حق کا ساتھ دیاجائے ۔ جناب الطاف حسین نے تمام مکاتب فکر سے تعلق رکھنے والے علمائے کرام اور عوام سے اپیل کی کہ وہ یوم عاشور کے موقع پر اپنے درمیان اتحاد و بھائی چارے کو برقرار رکھیں ، اپنے ارد گرد مشکوک عناصر پر کڑی نظر رکھیں اور محرم الحرام اور یوم عاشور کے دن کی حرمت اور تقدس کو برقرار رکھنے کیلئے اپنی اپنی سطح پر ہر ممکن اور عملی کردار ادا کریں ۔