واہگہ بارڈر کے قریب ہونے والا یہ خودکش دھماکہ پاکستان کی مسلح افواج، تمام ریاستی اداروں اور حکومت کیلئے ایک کھلا چیلنج ہے۔ الطاف حسین

ؒ لندن۔۔۔ 2014ء

متحدہ قومی موومنٹ کے قائدجناب الطاف حسین نے لاہورمیں واہگہ بارڈرکے قریب خودکش بم دھماکے کی شدیدالفاظ میں مذمت کی ہے اور دھماکے کے نتیجے میں درجنوں افرادکے شہیدوزخمی ہونے پر دلی افسوس کا اظہار کیا ہے۔ اپنے ایک بیان میں جناب الطاف حسین نے کہا کہ اسلام کانام لے کربم دھماکے کرنے والے اورمعصوم وبے گناہ کلمہ گو مسلمانوں کے خون سے ہولی کھیلنے والے درندہ صفت عناصر نہ تو اسلام کے دوست ہیں ،نہ مسلمانوں کے اورنہ ہی پاکستان کے بلکہ یہ عناصر اسلام، پاکستان اورانسانیت کے کھلے دشمن ہیں ۔جناب الطاف حسین نے کہاکہ آج واہگہ بارڈرکے قریب ہونے والایہ خودکش دھماکہ پاکستان کی مسلح افواج، تمام ریاستی اداروں اورحکومت کیلئے ایک کھلا چیلنج ہے، یہ دھماکہ ہم سب کی آنکھیں کھولنے کیلئے کافی ہے ۔انہوں نے کہاکہ اگرچہ پاکستان کی مسلح افواج وزیرستان اورمختلف قبائلی علاقوں میں ان دہشت گردعناصرکے خلاف بھرپورجنگ کررہی ہیں اوروہاں دہشت گردوں کاقلع قمع کررہی ہیں لیکن وزیرستان میں آپریشن کے باعث یہ دہشت گردصرف خیبرپختونخوا ہی میں نہیں بلکہ ملک بھرمیں پھیل گئے ہیں اورمختلف ناموں سے ملک کے مختلف شہروں میں پولیس، رینجرز،دیگرسیکوریٹی فورسز کے ساتھ ساتھ معصوم شہریوں کوبھی اپنی دہشت گردی کانشانہ بنارہے ہیں لیکن ہم اب بھی حقائق سے انکار کررہے ہیں۔ انہوں نے کہاکہ ضرورت اس بات کی ہے کہ ان دہشت گردوں کے خلاف آپریشن ضرب عضب کا دائرہ وزیرستان سے بڑھاکرملک بھرمیں پھیلایاجائے اورمعصوم عوام کے خون سے ہولی کھیلنے والے دہشت گردوں کاپورے ملک سے قلع قمع کیا جائے۔ جناب الطاف حسین نے خودکش دھماکے میں شہیدہونے والے شہریوں اوررینجرزکے جوانوں کے لواحقین سے دلی تعزیت اور ہمدردی کا اظہار کیا اور زخمیوں کی جلد صحتیابی کیلئے دعاکی ۔ جناب الطاف حسین نے کہاکہ بڑے پیمانے پر لوگوں کے زخمی ہونے پر اسپتالوں میں خون کی کمی درپیش ہے لہٰذا میں عوام سے اپیل کرتاہوں کہ وہ اسپتال پہنچ کر زخمیوں کیلئے بڑھ چڑھ کرعطیات دیں۔