شمالی علاقہ جات اورخیبرپختونخوا میں زلزلے کے ممکنہ خطرات کے پیش نظرنیشنل ڈیزاسٹر مینجمنٹ اتھارٹی کوجدیدخطوط پراستوارکیاجائے ،الطاف حسین

لندن:۔۔۔۔11؍اکتوبر2014ء

متحدہ قومی موومنٹ کے قائدجناب الطاف حسین نے پاکستان کے شمالی علاقہ جات میں زلزلے کے ممکنہ خطرات کے پیش نظروفاقی وصوبائی حکومتوں سے مطالبہ کیاہے کہ نیشنل ڈیزاسٹر مینجمنٹ اتھارٹی کو جدیدخطوط پراستوارکیاجائے اور اس سلسلے میں اقدامات بروئے کارلائیں جائیں ۔انہوں نے یہ بات خدمت خلق فاؤنڈیشن کی ڈیزاسٹرمینجمنٹ کمیٹی کے ارکان کے اجلاس سے خطاب کرتے ہوئے کہی۔اس موقع پرخدمت خلق فاؤنڈیشن کی ڈیزاسٹرمینجمنٹ کمیٹی نے جناب الطاف حسین کو پاکستان کے صوبہ خیبرپختونخوا اورشمالی علاقہ جات میں مختلف مواقعوں پر آنے والے چھوٹے پیمانے پرزلزلوں کے جھٹکوں کی روشنی میں ماہرین ارضیات،ماہرین فلکیات اوردیگرماہرین کی جانب سے تیارکی جانے والی رپورٹس اورپیشگوئیوں کاحوالہ دیتے ہوئے بتایاکہ پاکستان کے شمالی علاقہ جات اور خیبرپختونخوا کے مختلف علاقوں میں تواترکے ساتھ آنے والے زلزلے کے جھٹکے اس کا ثبوت ہیں کہ یہ علاقے لزلے کی زدپرہیں ۔جناب الطاف حسین نے ان رپورٹس پر تشویش کااظہارکرتے ہوئے کہاکہ مختلف اوقات میں ان علاقوں میں چھوٹے پیمانے پر آنے والے زلزلے کے جھٹکے ان اطلاعات کی تصدیق بھی کرتے ہیں لہٰذاضرورت اس بات کی ہے کہ وفاقی حکومت نیشنل ڈیزاسٹرمینجمنٹ اتھارٹی کوجدیدخطوط پر استوارکرے اوروفاقی وصوبائی حکومتیں کسی بھی قدرتی آفت سے نمٹنے کیلئے تمام ضروری اقدامات کریں۔جناب الطاف حسین نے اس ضمن میں خدمت خلق فاؤنڈیشن کی ڈیزاسٹر مینجمنٹ کمیٹی کی کاوشوں کوسراہااورانہیں اس سلسلے میں ضروری اقدامات کی ہدایات کی ۔انہوں نے اکتوبر2005ء میں آزادکشمیراورخیبرپختونخوا میں آنے والے زلزلے کے موقع پر خدمت خلق فاؤنڈیشن کی فلاحی سرگرمیوں کوسراہا۔ انہوں نے دعاکی کی اللہ تعالیٰ پاکستان کوہرقسم کی آفات سے محفوظ رکھے۔