کراچی کے مختلف علاقوں میں کچی شراب پینے کے باعث بیس سے زائد ہلاکتوں پر ایم کیو ایم رابطہ کمیٹی کی مذمت
گزشتہ کئی سالوں سے کچی شراب پینے کے باعث انسانی جانوں کا ضیاع ہورہاہے اس پر حکومتی اداروں کی خاموشی لمحہ فکریہ ہے
گورنر سندھ اور وزیر اعلیٰ سندھ واقعے کا فوری نوٹس لیکر ملوث ملزمان کے خلاف کاروائی کریں،رابطہ کمیٹی
کراچی۔۔۔۔8اکتوبر2014ء
متحدہ قومی موومنٹ کی رابطہ کمیٹی نے کراچی کے مختلف علاقوں میں کچی شراب پینے کے باعث بیس سے زائد ہلاکتوں کی سخت ترین الفاظ میں مذمت کی ہے اور اسے انتظامیہ کی ناکامی قرار دیا ہے۔اپنے مذمتی بیان میں رابطہ کمیٹی نے کہا کہ گزشتہ کئی سالوں سے کچی شراب پینے کے باعث انسانی جانوں کا ضیاع ہورہا ہے اس پر حکومتی اداروں کی خاموشی لمحہ فکریہ ہے۔رابطہ کمیٹی نے کہا کہ پولیس اور دیگر متعلقہ اداروں کی ذمہ داری ہے کہ ایسے واقعات کی روک تھام کی جائے اور اس قسم کے کاروبار میں ملوث افراد کو بے نقاب کیا جائے۔رابطہ کمیٹی نے گورنر سندھ ڈاکٹر عشرت العباد خان،وزیر اعلیٰ سندھ سید قائم علی شاہ سے مطالبہ کیا ہے کہ جو عناصر کچی شراب بنانے ،بیچنے اور ان کو مدد فراہم کرنے میں ملوث ہیں ان کے خلاف فوری کاروائی کی جائے اور مزید انسانی جانوں کو تحفظ فراہم کیا جائے۔