کوئٹہ ہزارہ ٹاؤن میں خودکش بم دھماکے پر ایم کیوایم کے قائد الطاف حسین کا اظہار مذمت

لندن:۔۔۔4؍اکتوبر2014ء

متحدہ قومی موومنٹ کے قائدجناب الطاف حسین نے کوئٹہ کے علاقے ہزارہ ٹاؤن میں خودکش بم دھماکے کی شدیدمذمت کی ہے اوراس کے نتیجے میں متعددافرادکے جاں بحق وزخمی ہونے پر دلی افسوس کااظہارکیاہے۔ایک بیان میں جناب الطاف حسین نے ہزارہ ٹاؤن علی آباد میں بم دھماکے کو کھلی دہشت گردی قراردیتے ہوئے کہاکہ اس سے قبل بھی کئی مرتبہ کوئٹہ کے علاقے میں ہزارہ کمیونٹی کواہل تشیع ہونے کی بنیاد پر خودکش حملوں اور بم دھماکوں کے ذریعے نشانہ بنایا جاچکا ہے جس میں ہزارہ برادری کے سینکڑوں معصوم وبے گناہ افراد شہید و زخمی ہوچکے ہیں اور اب بھی ہزارہ کمیونٹی کے لوگوں کوچن چن کردہشت گردی کانشانہ بنایا جارہا ہے اور ان کی نسل کشی کی جارہی ہے۔ آج ہزارہ ٹاؤن کے علاقے علی آباد میں ہونے والا خودکش بم دھماکہ اسی سلسلے کی کڑی ہے ۔ انہوں نے کہاکہ معصوموں کے خون کی ہولی کھیلنے والے یہ سفاک عناصر پورے ملک میں فرقہ وارانہ فساد کی آگ بھڑکانا چاہتے ہیں۔ جناب الطاف حسین نے بم دھماکے میں شہید ہونیوالے تمام افراد کے سوگوار لواحقین سے دلی تعزیت وہمدردی کا اظہار کرتے ہوئے دعاکی کہ اللہ تعالیٰ بم دھماکے میں شہید ہونیوالے افراد کی مغفرت فرمائے اور انہیں اپنی جواررحمت میں اعلیٰ مقام عطاکرے۔انہوں نے دھماکے زخمیوں سے دلی ہمدردی کا اظہار کرتے ہوئے ان کی جلدومکمل صحت یابی کیلئے بھی دعا کی ۔جناب الطاف حسین نے حکومت سے کہاکہ دہشت گردی گھناؤنی واردات میں ملوث دہشت گردوں اوران کے سرپرستوں کے خلاف سخت ایکشن کیاجائے اورانہیں عبرتناک سزادی جائے۔انہوں نے دھماکے پر ہزارہ کمیونٹی سے بھی دلی ہمدردی اوریکجہتی کا اظہار کیا۔