صوبائی وزیرِ صنعت و تجارت رؤف صدیقی کی بذریعہ خط یاد دہانی کے جواب میں وزیرِاعظم نواز شریف نے متاثرینِ سانحہ بلدیہ ٹاؤن کیلئے معاوضوں کی ادائیگی کے احکامات جاری کردیے

مورخہ 3اکتوبر 2014

صوبائی وزیرِ صنعت و تجارت رؤف صدیقی کی جانب سے وزیرِاعظم نواز شریف کو گزشتہ ماہ لکھے گئے خط کے جواب میں وزیرِاعظم نواز شریف نے چیف سیکریٹری سندھ کو سانحہ بلدیہ ٹاؤن کے شہدا کے لواحقین کو فی کس تین لاکھ روپے معاوضوں کی ادائیگی کے احکامات جاری کر دیے ۔ اس سے قبل صوبائی وزیرِ صنعت و تجارت رؤف صدیقی نے گزشتہ ماہ ستمبر کے اوائل میں سانحہ بلدیہ ٹاؤن کو دو برس گزرنے پر وزیرِاعظم نواز شریف کو بذریعہ خط ان کا وعدہ یاد دلاتے ہوئے لکھا تھا کہ بلدیہ ٹاؤن کے ہولناک سانحے کے وقت آپ نے بحیثیت اپوزیشن لیڈر شہید ہو جانے والے افراد کے لواحقین کو فی کس تین لاکھ روپے معاوضہ دینے کا وعدہ کیا تھا۔ اس سانحے کو دو برس گزر جانے کے باوجود آپ کے وعدہ کئے گئے معاوضوں کی ادائیگی نہیں ہوئی۔ اب آپ وزیرِ اعظم ہیں، اب تو متاثرین کو معاوضوں کی ادائیگی کے احکامات صادر کریں۔ دریں اثنا دو برس قبل صوبائی وزیرِ صنعت و تجارت رؤف صدیقی نے بلدیہ ٹاؤن کے ہولناک سانحے کے پیشِ نظر متاثرین کو معاوضوں کی ادائیگی یقینی بنانے کیلئے احتجاجاً اپنے عہدے سے استعفیٰ دیا تھا۔