پنجاب ۾ طوفاني برساتن ۽ سيلابي وهڪرن سان ٿيندڙ جاني ۽ مالي نقصانن مان سنڌ حڪومت سبق حاصل ڪري.حق پرست سينيٽرَ.
ڪراچي؛ 6 سيپٽمبر؛2014
حق پرست سينيٽرن چيو آهي ته پنجاب ۾ طوفاني برساتن ۽ سيلابي وهڪرن سان ٿيندڙ وڏي جاني ۽ مالي نقصانن مان سنڌ حڪومت سبق حاصل ڪري ۽ سنڌ ۾ ممڪنه طور تي ٿيندڙ برساتن کان نڀرڻ جي لاءِ فوري طور تي سنڌ ۾ رين ايمرجنسي نافذ ڪرڻ جو اعلان ڪري.پنهنجي هڪ گڏيل بيان ۾ انهن چيو ته سنڌ ۾ ممڪنه طور تي ٿيندڙ طوفاني برساتن کان عوام جي حفاظت جي لاءِ ٺوس قدمَ کڻڻ سنڌ حڪومت جي بنيادي ذميواري آهي پر افسوسناڪ صورتحال اها آهي ته برساتن کان بچڻ جي لاءِ لاڳاپيل ادارن کي اڳواٽ متحرڪ نه ڪيو پيو وڃي ۽ نه ئي ندي نالن ۾ صفائي ۽ بندن جي ڪنارن جي مرمت سميت ڪنهن قسم جا قدم نه پيا کنيا وڃن جنهن سان عوام ۾ وڏي ڳڻتي پاتي وڃي ٿي.انهن چيو ته سنڌ حڪومت جي طرفان مڪاني ادارن کي هن مهل تائين فنڊن کان محروم رکيو ويو آهي اها تمام صورتحال سنڌ ۾ وڏي تباهي جو سبب بڻجي سگهي ٿي.انهن گورنر سنڌ ڊاڪٽر عشرت العباد ۽ وزير اعلٰي سنڌ سيد قائم علي شاھ کان مطالبو ڪيو ته سنڌ ۾ فوري طور تي رين ايمرجنسي نافذ ڪئي وڃي ۽ مڪاني ادارن کي فنڊ فراهم ڪيا وڃن ۽ انهن جي مشينري کي به صحيح ڪرايو وڃي.