شاهراھ فيصل پوليس چوڪي تي دستي بم حملي تي ايم ڪيو ايم جي رابطا ڪميٽي جي طرفان مذمت جو اظهار.
ڪراچي؛ 3 سيپٽمبر؛ 2014
متحده قومي موومينٽ جي رابطا ڪميٽي ڪراچي ۾ شاهراھ فيصل تي پوليس چوڪي تي دستي بم حملي جي سخت ترين لفظن ۾ مذمت ڪئي آهي ۽ ان جي نتيجي ۾ ڪجھ پوليس اهلڪارن جي زخمي ٿيڻ تي وڏي ڏک ۽ افسوس جو اظهار ڪيو آهي. پنهنجي هڪ بيان ۾ رابطا ڪميٽي چيو ته ملڪ جي نازڪ ترين صورتحال ۾ ڪراچي ۾ دستي بم حملي جي ذريعي پوليس اهلڪارن کي زخمي ڪرڻ جي واردات کليل دهشت گردي آهي ۽ جيڪي ماڻهو به ان ۾ ملوث آهن اهي وڏي سزا جا مستحق آهن. رابطا ڪميٽي دستي بم حملي ۾ زخمي ٿيندڙ پوليس اهلڪارن سان همدردي جو اظهار ڪيو ۽ انهن جي جلد و مڪمل صحتيابي جي لاءِ دعا به ڪئي. رابطا ڪميٽي گورنر سنڌ ڊاڪٽر عشرت العباد ۽ وزير اعلٰي سنڌ سيد قائم علي شاھ کان مطالبو ڪيو ته دستي بم حملي ۾ ملوث دهشت گردن کي فوري طور تي گرفتار ڪري سخت ترين سزا ڏني وڃي.