ايم ڪيو ايم جي قائد جناب الطاف حسين جي پاڪستان عوامي تحريڪ جي سربراھ ڊاڪٽر طاهر القادري سان فون تي ڳالھ ٻولھ.
اوهان جتي ايترو صبر ڪيو آهي ڪجھ صبر ٻيو ڪريو .جناب الطاف حسين جي ڊاڪٽر طاهر القادري کي اپيل.
گورنر پنجاب چوڌري محمد سرور ۽ گورنر سنڌ ڊاڪٽر عشرت العباد ڀرپور ڪوششون ڪري رهيا آهن ته معاملا افهام و تفهيم سان حل ٿي وڃن.جناب الطاف حسين.
لنڊن؛ 28 آگسٽ 2014
متحده قومي موومينٽ جي قائد جناب الطاف حسين پاڪستان عوامي تحريڪ جي سربراھ ڊاڪٽر طاهر القادري سان ٽيليفون تي رابطو ڪيو ۽ انهن کي ٻڌايو ته گورنر پنجاب چوڌري محمد سرور ۽ گورنر سنڌ ڊاڪٽر عشرت العباد مون سان ڳالھ ٻولھ ڪرڻ کان پوءِ ڀرپور ڪوششون ڪري رهيا آهن ته جيئن معاملا افهام و تفهيم سان حل ٿي وڃن. جناب الطاف حسين ڊاڪٽر طاهر القادري کي به اپيل ڪئي ته انهن جتي ايترو صبر ڪيو آهي ڪجھ صبر ٻيو ڪن ۽ سڀ گڏجي ڪري دعا ڪريون ته اسان ماڻهو ڳالھ ٻولھ ۽ افهام و تفهيم سان معاملن کي بهتر بڻائڻ جي لاءِ جيڪي ڪوششون ڪري رهيا آهيون الله تعالٰي انهن کي ڪامياب ڪري، ان جي ڪري ٻنهي طرفن کان جلد بازي ۾ ڪوئي به فيصلو ڪرڻ جي بجاءِ صبر و تحمل ۽ سوچ ويچار کان پوءِ فيصلو ڪرڻ گهرجي. ڊاڪٽر طاهر القادري انهن جي موقف جي حمايت ڪرڻ تي جناب الطاف حسين جو شڪريو به ادا ڪيو.
****