علامه طاهر القادري جي خلاف مقدمو درج ڪرڻ جو فوري طور تي نوٽس ورتو وڃي. نديم نصرت.
پنجاب حڪومت جا غيردانشمنداڻه فيصلا پرامن عوام کي مشتعل ڪرڻ جو سبب بڻجي سگهن ٿا.
لنڊن؛ 6 آگسٽ 2014
متحده قومي موومينٽ جي رابطا ڪميٽي جي سينيئر ڊپٽي ڪنوينر نديم نصرت پنجاب حڪومت جي طرفان پاڪستان عوامي تحريڪ جي سربراھ ڊاڪٽر علامه طاهر القادري جي خلاف مقدمو درج ڪرڻ تي سخت مذمت جو اظهار ڪندي چيو آهي ته پنجاب حڪومت جا غيردانشمنداڻه فيصلا پرامن عوام کي مشتعل ڪرڻ جو سبب بڻجي سگهن ٿا. پنهنجي هڪ بيان ۾ انهن چيو ته ملڪ جي نازڪ ترين صورتحال جو تقاضا آهي ته سياسي معاملا ڳالھ ٻولھ ۽ افهام و تفهيم جي ذريعي حل ڪيا وڃن ۽ سياسي معاملن کي رياستي طاقت سان حل ڪرڻ جي پاليسي کان هر ممڪن گريز ڪيو وڃي. حڪومت جي طرفان پاڪستان عوامي تحريڪ جي يوم شهداء جي ميڙ کي لتاڙڻ جي لاءِ رياستي هٿڪنڊا استعمال ڪرڻ ڪنهن به طرح ملڪ و قوم جي مفاد ۾ نه آهن ۽ اهو عمل بنيادي انساني حقن جي به سنگين خلاف ورزي آهي، جنهن جي جيتري به مذمت ڪئي وڃي اها گهٽ آهي. نديم نصرت وزير اعظم ميان نواز شريف کان مطالبو ڪيو ته اهي علامه طاهر القادري جي خلاف مقدمو درج ڪرڻ جو فوري طور تي نوٽس وٺندي مقدمو فوري طور تي واپس ورتو وڃي، ملڪ و قوم ۽ جمهوريت جي مفاد ۾ دانشمندي جو مظاهرو ڪيو وڃي.