وزير اعظم ميان نواز شريف جي طرفان ڪراچي ۽ حيدرآباد جي لاءِ مختلف ترقياتي منصوبن جو اعلان تمام سٺي ڳالھ آهي. ايم ڪيو ايم.
اميد آهي ته وزير اعظم ان کي صرف اعلان جي حد تائين محدود نه رکندا بلڪه ان کي عملي شڪل به ڏيندا.ايم ڪيو ايم رابطا ڪميٽي.
ڪراچي؛ 10 جولائي 2014
متحده قومي موومينٽ جي رابطا ڪميٽي وزير اعظم ميان نواز شريف جي طرفان ڪراچي ۽ حيدرآباد جي لاءِ مختلف ترقياتي منصوبن جي اعلان جو خيرمقدم ڪيو آهي. پنهنجي هڪ بيان ۾ رابطا ڪميٽي چيو ته ڪراچي جو مسئلو اهو ئي آهي ته هر دور ۾ ڪراچي کي نظر انداز ڪيو ويو. ڪراچي قومي خزاني ۾ 70 سيڪڙو روينيو ڏيئي ٿو ۽ پوري ملڪ کي پالي ٿو پر ترقياتي منصوبن جي معاملي ۾ ان کي هميشه محروم رکيو ويو آهي. گذريل پوين ڏهاڪن ۾ ڪراچي جي آبادي تمام گهڻي وڌي چڪي آهي پر ان جي آبادي جي تناسب سان ان جي لاءِ فنڊَ مختص نه ڪيا ويا، جنهن جو نتيجو اهو نڪتو آهي ته پوري ملڪ کي ڪمائي ڪري ڏيڻ واري ڪراچي پاڻ ترقي ۽ خوشحالي کان محروم آهي. رابطا ڪميٽي چيو ته ايم ڪيو ايم جي شهري حڪومت جي دور ۾ ڪراچي جي لاءِ بهترين گرين بسن کي متعارف ڪرايو ويو پر شهري حڪومت جي ختم ٿيندي ئي هڪ سازش جي تحت ان گرين بسن کي ڊپو ۾ وجهي ڪري تباه ڪري چڏيو ويو . ايم ڪيو ايم سابقه دور حڪومت ۾ سرڪلر ريلوي کي ٻيهر شروع ڪرايو هو پر ان کي به ڄاڻي ٻجهي بند ڪيو ويو. ڪراچي وانگر حيدرآباد ، ميرپورخاص، سکر ۽ سنڌ جا ٻيا شهري علائقا به بهتر سفري سهولتن. اعلٰي تعليمي ادارن ۽ ٻين ترقياتي منصوبن کان محروم آهن. رابطا ڪميٽي چيو ته اها ڳالھ تمام سٺي آهي ته وزير اعظم اڄ ڪراچي جي ٽرانسپورٽ، سرڪلر ريلوي جي بحالي، پاڻي جي فراهمي جي منصوبي ۽ حيدرآباد يونيوورسٽي جي قيام جو اعلان ڪيو آهي اهو تمام سٺو آهي. اميد آهي ته وزير اعظم ان کي صرف اعلان جي حد تائين محدود نه رکندا بلڪه ان کي عملي شڪل به ڏيندا.رابطا ڪميٽي وزير اعظم نواز شريف کان مطالبو ڪيو ته سنڌ جي ٻئي وڏي شهر حيدرآباد کي تباهي کان بچايو وڃي ۽ ان جي ترقي جي لاءِ پيڪيج جو اعلان ڪيو وڃي.
*****