عبدالستار ايڌي مرحوم ۽ امجد صابري مرحوم قومي اثاثو آهن ۽ انهن جي خدمتن کي هميشه ياد رکيو ويندو.سيد شاهد پاشا

ڪراچي: 16 جولائي 2016 

                    ايم ڪيو ايم جي ڊپٽي ڪنوينر شاهد پاشا چيو آهي ته عبدالستار ايڌي مرحوم ۽ امجد صابري مرحوم قومي اثاثو آهن، جن جي خدمتن کي هميشه ياد رکيو ويندو. انهن خيالن جو اظهار انهن ڊفينس دو تلوار تي عبدالستار ايڌي مرحوم ۽ امجد صابري مرحوم جي ياد ۾ ميڻ بتيون روشن ڪرڻ جي تقريب کي خطاب ڪندي ڪيو. ان موقعي تي رابطا ڪميٽي ڊپٽي ڪنوينر نسرين جليل، رابطا ڪميٽي ميمبر محفوظ يار خان، ساٿي اسحٰق، محمد ڪمال ملڪ، اسيمبلي ميمبر ۽ ڪارڪن به وڏي تعداد ۾ موجود هئا. شاهد پاشا چيو ته اڄ ان تقريب جو مقصد انسانيت دوست شخصيتن کي خراج تحسين پيش ڪرڻ آهي. جن پنهنجي پوري زندگي انسانيت جي خدمت جي لاءِ وقف ڪري ڇڏي . انهن چيو ته عبدالستار ايڌي اڌ صدي اڳ جيڪو ٻوٽو پوکيو هو اڄ اهو هڪ وڏو وڻ بڻجي چڪو آهي ۽ ان وڻ مان اڄ لکين ماڻهو فائدو حاصل ڪري رهيا آهن.انهن چيو ته دنيا جي وڏي ايمبولينس سروس جنهن کي گنيز بڪ آف ورلڊ ريڪارڊ ۾ شامل ڪيو ويو هو اهو به ايڌي صاحب جي خدمتن جو هڪ تمام وڏو ثبوت آهي.انهن چيو ته قائد تحريڪ جناب الطاف حسين به ايم ڪيو ايم جي قيام کان اڳ خدمت خلق ڪميٽي بڻائي هئي.جيڪا اڄ ڪي ڪي ايف جي نالي سان پنهنجيون خدمتون انجام ڏيئي رهي آهي.آخر ۾ انهن قائد تحريڪ جناب الطاف حسين جي طرفان ايڌي صاحب ۽ امجد صابري جي خدمتن کي زبردست خراج تحسين به پيش ڪيو. ان موقعي تي تقريب کي خطاب ڪندي ڊپٽي ڪنوينر محترمه نسرين جليل چيو ته ايڌي صاحب ۽ امجد صابري پاڪستان جي سڃاڻ آهن. جن جي خدمتن کي هميشه ياد رکيو ويندو. تقريب جي اختتام تي ايڌي صاحب ۽ امجد صابري جي ياد ۾ ميڻ بتيون به روشن ڪيون ويون. 

*****