ايم ڪيو ايم ميرپورخاص زونل ڪميٽي جي ميمبر ۽ ڪائونسلر فاروق دراني کي فوري طور تي بازياب ڪرايو وڃي. ايم ڪيو ايم ڪنوينر نديم نصرت
لنڊن: 29 اپريل 2016
متحده قومي موومينٽ جي رابطا ڪميٽي جي ڪنوينر نديم نصرت وفاقي حڪومت کان مطالبو ڪيو آهي ته ايم ڪيو ايم ميرپورخاص زونل ڪميٽي جي ميمبر ۽ ڪائونسلر فاروق جميل دراني کي فوري طور تي بازياب ڪرايو وڃي. پنهنجي هڪ بيان ۾ انهن چيو ته فاروق دراني جو شمار ميرپورخاص ۾ ايم ڪيو ايم جي سينيئر ڪارڪنن ۾ ٿئي ٿو. اهي نه صرف ميرپورخاص جي زونل ڪميٽي جا ميمبر آهن بلڪه ڪائونسلر به آهن ۽ انهن جي خلاف ڪوئي به ڪيس نه آهي. فاروق دراني کي 22 اپريل تي پوليس ۽ قانون نافذ ڪرڻ وارن ادارن ميرپورخاص ۾ انهن جي گهر کان حراست ۾ ورتو هو. پر هڪ هفتو گذرڻ جي باوجود به هن مهل تائين نه ته انهن جي گرفتاري ظاهر ڪئي وئي آهي ۽ نه ئي اهو ٻڌايو پيو وڃي ته انهن کي ڪٿي رکيو ويو آهي. جنهن جي ڪري انهن جي گهر وارا سخت پريشان آهن. انهن چيو ته اهڙي طرح ايم ڪيو ايم جا 100 کان وڌيڪ ڪارڪن به گرفتاري کان پوءِ لاپتا آهن. انهن چيو ته ائين ڪري قانون ۽ انساني حقن جي به کليل خلاف ورزي ڪئي پئي وڃي. انهن وزير اعظم ميان نواز شريف، وفاقي وزير داخلا چوڌري نثار علي خان ۽ وزير اعلٰي سنڌ سيد قائم علي شاھ کان مطالبو ڪيو ته اهي فاروق دراني کي فوري طور تي بازياب ڪرائين جيڪڏهن انهن جي خلاف ڪوئي الزام به آهي ته انهن کي غير قانوني حراست ۾ رکڻ جي بجاءِ ڪورٽ ۾ پيش ڪيو وڃي ۽ ايم ڪيو ايم جي ڪارڪنن کي گرفتار ڪرڻ کان پوءِ لاپتا ڪرڻ جو سلسلو به بند ڪيو وڃي.
*****