ڪراچي يونيورسٽي جي زمينن تي قبضا ختم ڪرائي انهن زمينن تي شاگردن جي لاءِ ريسرچ سينٽر قائم ڪنداسين. ڊاڪٽر فاروق ستار

ڪراچي: 20 اپريل 2016 

ايم ڪيو ايم جي سينيئر ڊپٽي ڪنوينر ڊاڪٽر فاروق ستار چيو آهي ته ڪراچي يونيورسٽي جي زمينن تان قبضا ختم ڪرائي انهن زمينن تي شاگردن جي لاءِ ريسرچ سينٽر قائم ڪنداسين. انهن خيالن جو اظهار انهن اي پي ايم ايس او جي زير اهتمام 14 هين امن ڪرڪيٽ ٽورنامينٽ جي اختتامي تقريب جي موقعي تي پريس بريفنگ ڏيندي ڪيو. ان موقعي تي اي پي ايم ايس او جي وائيس چيئرپرسن وجيهه رئوف، جوائنٽ سيڪريٽري زونه نقوي ۽ ٻيا به موجود هئا. ڪرڪيٽ ميچ جو فائنل اڪنامڪس ۽ هيلٿ اينڊ فزيڪل ڊپارٽيمنٽ جي ٽيمن جي وچ ۾ ٿيو جنهن ۾ اڪنامڪس جي ٽيم فتح حاصل ڪئي. ان موقعي تي ڊاڪٽر فاروق ستار چيو ته ڪراچي يونيورسٽي ۾ 65 سيڪڙو نياڻيون تعليم حاصل ڪري رهيون آهن. ان مان ثابت آهي ته ڪراچي يونيورسٽي نياڻين جي يونيورسٽي آهي. انهن چيو ته ڪراچي يونيورسٽي جي زمينن تي جيڪي عناصر قبضا ڪري رهيا آهن. انهن زمينن تان قبضا ختم ڪرائي شاگردن ۽ شاگردياڻين جي لاءِ ريسرچ سينٽر قائم ڪنداسين. انهن چيو ته ميئر ۽ ڊپٽي ميئر جي اليڪشن ۾ جيڪي رڪاوٽون هيون اهي هاڻي دور ٿي ويون آهن ۽ هاڻي اسان کي تعليم جو سٺو نظام ڏيڻو آهي. پاڻي جي مسئلي کي حل ڪرڻو آهي ۽ ان سان گڏو گڏ رانڌين جي سرگرمين کي به پروموٽ ڪرڻو آهي. انهن چيو ته ڪراچي يونيورسٽي جي پاليسي ٺاهڻ وڏيرن جو ڪم نه آهي بلڪه ان جي پاليسي ٺاهڻ ڪراچي يونيورسٽي جي استادن جو ڪم آهي. انهن چيو ته ضمير فروش ٽولو وڪيٽون ڪيرائڻ جون ڳالهيون ڪري رهيو آهي. پر مان انهن کي ٻڌائڻ چاهيان ٿو ته ڀلي اهي ڪيتريون ئي وڪيٽون ڪيرائي وٺن پر جڏهن 2018 جي اليڪشن ۾ عوام انهن جون وڪيٽون ڪيرائڻ شروع ڪيون ته پوءِ انهن جو ڇا ٿيندو .آخر ۾ انهن کٽندڙ ٽيم کي ٽرافي ۽ رانديگرن ۾ انعام به ورهايا.