ایم کیوایم کو انتظام حکومت ملا تو چائنا کٹنگ، پلاٹوں اور زمینوں پرقبضوں میں ملوث افراد کے خلاف قانون کے تحت کارروائی کی جائے گی۔ الطاف حسین

لندن ۔۔۔ 25 مارچ 2016ء

متحدہ قومی موومنٹ کے قائدجناب الطاف حسین نے کہاہے کہ ایم کیوایم کوجب بھی انتظام حکومت ملا تو جولوگ بھی چائناکٹنگ اورلوگوں کے پلاٹوں اور زمینوں پرقبضوں میں ملوث ہوں گے ان کے خلاف قانون کے تحت کارروائی کی جائے گی اورجن لوگوں کی زمینوں اورپلاٹوں پر قبضے ہوئے ہیں انہیں انصاف دلایا جائے گا۔ انہوں نے یہ بات جمعہ کی صبح نائن زیروپر رابطہ کمیٹی اورتنظیمی شعبہ جات کے ارکان سے گفتگوکرتے ہوئے کہی ۔انہو ں نے کہاکہ چائنا کٹنگ ، پارکوں، پلاٹوں اور زمینوں پرقبضے میری کبھی بھی تعلیمات نہیں تھیں اورمیں نے تحریک کے کارکنوں کوہمیشہ غیرقانونی سرگرمیوں سے دوررہنے کادرس دیا۔ انہوں نے کہاکہ کل تک ایم کیوایم پر چائنا کٹنگ کے الزامات لگائے جاتے تھے لیکن آج جب ان غیرقانونی سرگرمیوں میں ملوث افرادکولایاگیاہے توکوئی اس کاذکرنہیں کرتا۔ جناب الطاف حسین نے کہاکہ جولوگ بعض نادیدہ قوتوں سرپرستی میں چندروزقبل کراچی میں لائے گئے انہیں کراچی کے عوام نے پہلے ہی مستردکردیاتھااورکل حیدرآباد کے عوام نے بھی ایسے عناصر کومستردکردیا۔ انہوں نے گزشتہ روز شاندارریلی کے انعقادپر حیدرآبادکے کارکنوں،ماؤں، بہنوں، بزرگوں سمیت تمام عوام کوزبردست خراج تحسین پیش کیا۔