ائين نه ٿئي جو سنڌ حڪومت جي خلاف ڪراچي کان شروع ٿيندڙ احتجاج سڄي سنڌ ۾ ڦيلجي وڃي. عارف خان

ڪراچي: 16 فيبروري 2016 

                    ايم ڪيو ايم جي رابطا ڪميٽي جي ميمبر عارف خان چيو آهي ته ڪراچي جي عوام کي انهن جو حق نه ڏنو ويو ته اهي پنهنجو حق ڇڻن ڄاڻين ٿا ۽ ائين نه ٿئي جو ڪراچي کان شروع ٿيندڙ اهو احتجاج سڄي سنڌ ۾ ڦيلجي وڃي. انهن خيالن جو اظهار انهن حسن اسڪوائر چورنگي تي هڪ وڏي احتجاجي مظاهري کي خطاب ڪندي ڪيو. ان موقعي تي رابطا ڪميٽي، اسيمبلي ميمبر ۽ ٻيا به موجود هئا. عارف خان چيو ته ڪراچي جي عوام جو اهو احتجاج ان ڳالھھ جي عڪاسي ڪري ٿو ته توهان کي ڪراچي جي مڪاني نمائندن کي اختيار ڏيڻا پوندا. انهن چيو ته پي پي جي حڪومت ڪراچي جي عوام جي ٽيڪسن مان حاصل ٿيندڙ رقم مان پنهنجا ڪيسا ڀري رهي آهي. ان موقعي تي خطاب ڪندي سنڌ اسيمبلي ۾ اپوزيشن ليڊر خواجه اظهار الحسن چيو ته ڪراچي وفاق کي 23 سو ارب روپيا ٽيڪس جي مد ۾ ڏيئي ٿو. پر موٽ ۾ ڪراچي کي 23 روپيا به نه ٿا ملن، انهن چيو ته پوري دنيا ۾ پيٽرول جي قيمتن ۾ ڪمي ٿي رهي آهي. پر پاڪستان ۾ پيٽرول جي اگهن ۾ ڪا به  ڪمي نه ٿي رهي آهي. جڏهن ته پيٽرول جي اگهن ۾ ڪمي جي باوجود بجلي جي بلن ۾ به لڳاتار اضافو ٿيندو پيو اچي. انهن چيو ته پيٽرول جي اگهن ۾ ڪمي، بجلي ۽ پاڻي جي فراهمي جي لاءِ وفاقي حڪومت فوري طور تي ايڪشن وٺي. انهن چيو ته ڪراچي جي شهرين سول نافرماني جو فيصلو ڪري ورتو ته پوءِ سنڌ حڪومت جو رهڻ مشڪل ٿي ويندو.ان موقعي تي خطاب ڪندي علي رضا عابدي چيو ته پي پي جي تعصب پرست حڪومت مڪاني ادارن کي اختيار ڏيڻ نه ٿي چاهي ته پوءِ اسان به مڪاني ادارن کي آئيني ۽ قانوني جنگ جي ذريعي اختيار ڏياري ڪري ئي رهنداسين.ان موقعي تي خطاب ڪندي فيصل سبز واري چيو ته اسان ڪراچي کي اختيار ڏياري ڪري ئي رهنداسين ۽ ڪراچي جي حقن جي حفاظت ڪندا سين. ان موقعي تي خطاب ڪندي هير سوهو چيو ته پي پي جي حڪومت ڪراچي کي مفتوحه شهر سمجهي ڪري ان کي لٽڻ تي لڳل آهي . ان موقعي تي ارشد وهره خطاب ڪندي چيو ته سنڌ حڪومت موهن جي دڙو کي پنهنجو رول ماڊل بڻائي رکيو آهي ۽ انهي جي ڪري ئي پي پي جي حڪومت ڪراچي کي به آهسته آهسته موهن جو دڙو ۾ تبديل ڪري رهي آهي. 

*****