ايم ڪيو ايم جي قائم مقام ڪنوينر نديم نصرت جي صدارت هيٺ رابطا ڪميٽي پاڪستان ۽ لنڊن جو گڏيل اجلاس.

لنڊن: 10 جنوري 2016 

                 متحده قومي موومينٽ جي رابطا ڪميٽي لنڊن ۽ پاڪستان جو گڏيل اجلاس قائم مقام ڪنوينر نديم نصرت جي صدارت هيٺ ٿيو. اجلاس ۾ سينيئر ڊپٽي ڪنوينر ڊاڪٽر فاروق ستار، ڊپٽي ڪنوينر َ ڪهف الورٰي ۽ شاهد پاشا به موجود هئا. اجلاس ۾ تنظيمي، سياسي ۽ عوامي مسئلن جي متعلق تفصيلي غور ڪيو ويو ۽ ان حوالي سان ڪيترائي اهم فيصلا به ڪيا ويا. اجلاس ۾ اليڪشن ڪميشن جي طرفان ڪراچي جي ميٽرو پوليٽن ڪارپوريشن ۽ سڄي سنڌ ۾ ميونسپل ڪارپوريشنن جي ميئرن، ضلعي چيئرمينن ۽ عورتن، اقليتن ۽ نوجوانن جي مخصوص سيٽن جي اليڪشن ۾ غير ضروري دير ڪرڻ تي ڳڻتي جو اظهار به ڪيو ويو ۽ چيو ويو ته اها غير ضروري دير عوامي مسئلن جي حل ۾ دير جو سبب بڻجي رهي آهي. اجلاس ۾ چيف اليڪشن ڪمشنر کان مطالبو ڪيو ويو ته ميئرن، ضلعي چيئرمينن، عورتن، اقليتن ۽ نوجوانن جي مخصوص سيٽن جا اليڪشن فوري طور تي ڪرايا وڃن. ان حوالي سان مختلف فيصلا به ڪيا ويا. اجلاس ۾ سنڌ حڪومت جي طرفان مڪاني ادارن کي انهن جي اختيارن کان لڳاتار محروم ڪرڻ جي به سخت ترين لفظن ۾ مذمت ڪئي وئي ۽ چيو ويو ته پي پي جي سنڌ حڪومت پهرين ته مڪاني اليڪشن کان ڀڄڻ پئي چاهي پر جڏهن سپريم ڪورٽ جي حڪم ۽ سخت عوامي دٻاءُ جي ڪري سنڌ حڪومت مڪاني اليڪشن ڪرايا آهن ته هاڻي سنڌ حڪومت ڪراچي سميت سڄي سنڌ جي مڪاني ادارن کان انهن جا بنيادي اختيار ئي ڇني رهي آهي . مڪاني اليڪشن جي اختيارن جي معاملي کي هر سطح تي اٿارڻ جي سلسلي ۾ مختلف فيصلا به ڪيا ويا. اجلاس ۾ چيو ويو ته سنڌ حڪومت هڪ طرف ته مڪاني ادارن جا اختيار پاڻ وٽ رکي رهي آهي ته ٻئي طرف صفائي سٿرائي جهڙن معاملن تي به توجه ڏيڻ جي لاءِ تيار نه آهي. جنهن جي ڪري ڪراچي جا سمورا علائقا گندگي جو ڍير بڻجي چڪا آهن. جڏهن ته ٻين شهرن جي حالت به تمام گهڻي خراب آهي. اجلاس ۾ فيصلو ڪيو ويو ته پنهنجي مدد پاڻ جي تحت علائقن ۾ صفائي مهم شروع ڪئي ويندي ۽ علائقن کي گند جي ڍيرن کان نجات ڏياري ويندي. اجلاس ۾ ايم ڪيو ايم جي قومي ۽ صوبائي اسيمبلين جي ميمبرن جي ڪارڪردگي کي وڌيڪ بهتر بڻائڻ تي به زور ڏنو ويو. اجلاس ۾ سمورن تنظيمي شعبن جي ڪارڪردگي جو به جائزو ورتو ويو ۽ فيصلو ڪيو ويو ته تنظيم جي هر سطح تي تنظيم نو ڪئي ويندي.

*****