ٺٽي جي ويجهو ڪي بي فيڊر ڪينال ۾ وڏي پيماني تي مئل جانور ڦاٿل هجڻ تي سنڌ اسيمبلي جي حق پرست ميمبرن جي طرفان ڳڻتي جو اظهار.
ڪراچي: 21 ڊسمبر 2015
سنڌ اسيمبلي جي حق پرست ميمبرن ڪي بي فيڊر ڪينال ۾ مئل جانور ڦاٿل هجڻ تي وڏي ڳڻتي جو اظهار ڪيو آهي. پنهنجي هڪ بيان ۾ انهن چيو ته ڇو ته ڪي بي فيڊر ڪينال مان ئي ڪراچي جي شهرين کي پاڻي ملي ٿو ۽ اهو پاڻي ڪينجهر ڍنڍ مان اچي ٿو جنهن جي ڪري ڪراچي جي شهرين ۾ وڏي پيماني تي بيماريون پکڙجڻ جو خطرو آهي . انهن چيو ته ايريگيشن، پبلڪ هيلٿ ۽ ضلعي مينجمينٽ جي نااهلي جي ڪري اهو پاڻي تمام گندو ٿي ويو آهي ڇو جو ان ۾ مئل جانورن جو ڍير لڳي ويو آهي جنهن جي ڪري اهو پاڻي ڌپ هڻي ويو آهي ۽ پيئڻ جي قابل به نه رهيو آهي. انهن چيو ته پاڻي جي صفائي جي لاءِ ڪلورين ۽ ٻين دوائن جي مد ۾ ڪروڙين روپين جو بجيٽ اچي ٿو پر خبر نه آهي ته اهو بجيٽ ڪيڏانهن وڃي ٿو. انهن سنڌ حڪومت کان مطالبو ڪيو ته اها ان سلسلي ۾ فوري طور تي قدم کڻي.
*****