ايم ڪيو ايم هڪ پر امن سياسي جماعت آهي، اسان جي بي ڏوهي ڪارڪنن کي گرفتار ڪري انهن جي معاشري ۾ شخصيت خراب ڪئي پئي وڃي. ايم ڪيو ايم رابطا ڪميٽي.
ڪراچي: 3 ڊسمبر 2015
ايم ڪيو ايم جي رابطا ڪميٽي ڪراچي جي مختلف علائقن ۾ بي ڏوهي ڪارڪنن جي گرفتارين جي سخت ترين لفظن ۾ مذمت ڪندي ان کي مڪاني اليڪشن جي دوران ايم ڪيو ايم کي ڪمزور ڪرڻ جي هڪ سازش قرار ڏنو آهي. پنهنجي هڪ بيان ۾ رابطا ڪميٽي چيو ته پوليس اورنگي ٽائون علي ڳڙھ ڪالوني مان ايم ڪيو ايم پنجابي سرائيڪي آرگنائزنگ ڪميٽي جي مرڪزي عهديدار فيض سلطان ، پي او سي جي ڪارڪن لياقت ، برنس روڊ کان يونٽ جي عهديدار معراج ۽ ڪارڪن افسر رحمٰن کي گهرن تان گرفتار ڪري ورتو آهي. رابطا ڪميٽي چيو ته اليڪشن سرگرمين ۾ مصروف ايم ڪيو ايم جي ڪارڪنن کي اليڪشن سرگرمين کان روڪڻ ۽ ڏنڍي جي زور تي ايم ڪيو ايم جو سياسي مينڊيٽ ڇني ڪري من پسند جماعتن کي ڏيڻ جي سازش ڪئي پئي وڃي. رابطا ڪميٽي وزير اعظم ميان نواز شريف ۽ چيف اليڪشن ڪمشنر کان مطالبو ڪيو ته اهي ڪارڪنن جي گرفتارين جو فوري طور تي نوٽس وٺن ۽ سمورن گرفتار ٿيل ڪارڪنن کي آزاد ڪرائين ۽ ايم ڪيو ايم کي به سياسي مهم هلائڻ جي کليل آزادي ڏني وڃي.
*****