ايم ڪيو ايم جي رابطا ڪميٽي جو وفاقي حڪومت جي طرفان 40 ارب روپين جو اضافي ٽيڪس لڳائڻ جي فيصلي جي سخت مذمت.
ڪراچي: 2 ڊسمبر 2015
متحده قومي موومينٽ جي رابطا ڪميٽي وفاقي حڪومت جي طرفان ريگوليٽري ڊيوٽي جي مد ۾ کائڻ پيئڻ جي درآمدي شين سميت روز مره جي استعمال جي 350 شين تي تقريبن 40 ارب روپين جا اضافي ٽيڪس لڳائڻ تي وڏي ڳڻتي جو اظهار ڪندي چيو آهي ته درآمدي جي روز مره جي شين تي ٽيڪس جو سنئون سڌو اثر غريب ۽ وچولي طبقي تي پوندو.پنهنجي هڪ بيان ۾رابطا ڪميٽي چيو ته ملڪ ۾ تيزي سان وڌندڙ مهانگائي پهرين ئي غريبن جي چيلھھ ڀڃي ڇڏي آهي پر جڏهن ته حڪومت جي طرفان لڳايل اضافي ٽيڪس جو بار به سنئون سڌو غريبن تي ئي پوندو. انهن وڌيڪ چيو ته روزمره جي استعمال جي شين سميت ٻين ڪيترن ئي شين جي ڊيوٽي ۾ اضافي سان ملڪ جي معيشت کي ته ايترو فائدو نه پهچندو جيترو ان جو اثر غريبن تي پوندو. انهن چيو ته هلندڙ مالي سال ۾ 40 ارب روپين جي محصولات جي ڪمي کي پورو ڪرڻ جو حل اهو نه آهي ته محصولات ۾ اضافو ڪيو وڃي.جيڪڏهن ملڪ جي ڪل آمدني جي ذريعن ۾ اضافو مقصود آهي ته ٽيڪس بيس ۾ اضافي سان گڏو گڏ زرعي آمدني تي به ٽيڪس عائد ڪيو وڃي. انهن وزير اعظم ميان نواز شريف ۽ وفاقي وزير خزانه اسحاق ڊار کان مطالبو ڪيو ته اهي 40 ارب روپين جي اضافي ٽيڪس لڳائڻ جي فيصلي تي نظر ثاني ڪن.
*****